រាជធានីភ្នំពេញ៖តាមប្រភពពីក្រុមគ្រួសារឲ្យដឹងថា កាលពីវេលាប្រមាណជា៦ និង៣០នាទីព្រឹកនាថ្ងៃទី២៨ ខែតុលា ឆ្នាំ២០១៦នេះ សន្ដិសុខបុរី «សម្បតិ្ត មានហេង» ឈ្មោះ មាស ដីដុំ ដែលត្រូវលោកចៅសង្កាត់ព្រែកប្រាវ៉ៃនោះ ត្រូវបាន បញ្ជូនទៅព្យាបាលបន្តនៅ មន្ទីរពេទ្យប្រទេសវៀតណាម ដោយស្ថាន ភាពជម្ងឺរបស់ជនរងគ្រោះពុំបានធូរស្រាលនៅឡើយ ។
ចំណែកគ្រូពេទ្យដែលព្យាបាលជម្ងឺជនរងគ្រោះ បានអោយដឹងថា អ្នកជម្ងឺមានអាការហើម (ខ្ទាំ) ក្បាលខាងស្ដាំ ដែលប៉ះពាល់ដល់សរសៃដៃខាងស្ដាំកម្រើកមិនរួច ដូច្នេះក៏សម្រេចបញ្ជូនជនរងគ្រោះទៅ ព្យាបាលនៅប្រទេសវៀតណាមបន្តទៀត ។
យ៉ាងណាក៏ដោយ ក្រុមគ្រួសារអះអាងថា ចំពោះថ្លៃចំណាយលើការធ្វើដំណើរ ថ្លៃព្យាបាល និងថ្លៃស្នាក់នៅគឺក្រុមហ៊ុនធានារ៉ាប់រងទាំងស្រុងទៅលើការចំណាយនេះ ។ ប៉ុន្តែអ្វីដែលធ្វើឲ្យក្រុមគ្រួសារមិនសប្បាយចិត្តគឺជនបង្កនៅមានសេរីភាពនៅឡើយ រហូតមកដល់ពេលនេះ ។
ពាក់ព័ន្ធករណីនេះ គេបានទទួលព័ត៌មានថា ចៅសង្កាត់ព្រែកប្រា លោក ហួរ ហួត ដែលបង្ករអំពើហិង្សានេះ បានរត់គេចខ្លួនបាត់ហើយ ជាមួយគ្នានេះកម្លាំងមានសមត្ថកិច្ចក៏កំពុងស្វែងរកចាប់ខ្លួនផងដែរ៕
