ដោយ៖ប៉ែន សុផល
បាត់ដំបង៖នៅលើកំណាត់ផ្លូវជាតិលេខ៥មានករណីគ្រោះថ្នាក់ចរាចរណ៍មួយបានកើតឡើងនៅវេលាម៉ោង២៣ និង៣០នាទីថ្ងៃទី១ ធ្នូ២០១៦តាមបណ្ដោយផ្លូវជាតិលេខ៥ត្រង់ចំណុចភូមិដុបក្រសាំង ឃុំព្រៃតូច ស្រុកមោងឫស្សី ខេត្តបាត់ដំបង បង្កឡើងរថយន្តមួយគ្រឿងបើកបរដោយជនជាតិថៃ បុករថយន្តជនជាតិខ្មែរបណ្តាលឲ្យរងរបួស៤នាក់។
តាមប្រភពព័ត៌មានបានឲ្យដឹងថា មុនកើតហេតុគេឃើញរថយន្ត១គ្រឿងម៉ាក toyota vigo ពណ៌ ទឹកប្រាក់ចង្កូតស្ដាំពាក់ស្លាកលេខ9336 អ្នកបើកបរជាជាជាតិថៃឈ្មោះ ដាំ ភេទប្រុសអាយុ៤៨ឆ្នាំ រស់នៅប្រទេសថៃបើកបរក្នុងទិសដៅបញ្ច្រាស់គ្នា យន្តថៃឡើងវ៉ារថយន្ត ធំខាងមុខដោយមិនស្គាល់ច្បាប់ទម្លាប់ចរាចរណ៍ផ្លូវគោករបស់កម្ពុជានោះឡើយ ទើបវ៉ាមិនផុតក៏ជ្រុលចង្កូតទៅបុករថយន្ត១គ្រឿងផ្សេងទៀត ម៉ាកកាមរីចង្កូតស្ដាំសេរីឆ្នាំ៩៣ ពណ៌ស ពាក់ស្លាកលេខប៉ៃលិន2A.0321 អ្នកបើកបរដោយឈ្មោះ ឈន ចាន់ ភេទប្រុស អាយុ៣៥ឆ្នាំ មុខរបរអ្នកធ្វើចំការ រស់នៅភូមិបឹងប្រលិត សង្កាត់ស្ទឹងកាច់ ស្រុកសាលាក្រៅ ខេត្តប៉ៃលិន រងរបួសធ្ងន់ និងអ្នករួមដំណើរ៣នាក់ទី១-ឈ្មោះ ជុំ ឡូញ ភេទប្រុសអាយុ៣៤ឆ្នាំមុខរបរអ្នកធ្វើចំការរស់នៅភូមិបឹងប្រលិត សង្កាត់ស្ទឹងកាច់ ស្រុកសាលាក្រៅខេត្តប៉ៃលិនរបួស(របួសស្រាល)។ ទី២-ឈ្មោះ ជុំ ចិន ភេទស្រីអាយុ៣២ឆ្នាំមុខរបរធ្វើចំការរស់នៅភូមិបឹងប្រលិត សង្កាត់ស្ទឹងកាច់ ស្រុកសាលាក្រៅខេត្តប៉ៃលិនរបួស(របួសស្រាល)។ ទី៣-ឈ្មោះឈឿន មករា ភេទស្រីអាយុ៤ឆ្នាំត្រូវជាកូនជុំចិនរបួស(របួសស្រាល)។
បច្ចុប្បន្នជនរងគ្រោះទាំង៣នាក់ត្រូវសមត្ថកិច្ចបញ្ជូនទៅសង្គ្រោះសម្រាកព្យាបាលនៅមន្ទីពេទ្យបង្អែកស្រុកមោងឫស្សី។ រីឯរថយន្តបង្កទាំងពីរគ្រឿងត្រូវសមត្ថកិច្ចនាំយកទៅរក្សាទុកនៅអធិការដ្ឋានគរបាលស្រុកមោងរង់ចាំធ្វើការដោះស្រាយ ទៅតាមច្បាប់នៅពេលក្រោយ៕
