លោក ស៊ីន ច័ន្ទឆាយា គឺជាសិល្បករចម្រៀងប្រជាប្រិយម្នាក់ និងជាបុត្រារបស់លោក ស៊ីន ស៊ីសាមុត អធិរាជសំឡេងមាសនៃព្រះរាជាណាចក្រកម្ពុជា។
១.ប្រវត្តិសង្ខេប
– លោក ស៊ីន ច័ន្ទឆាយា ចាប់កំណើតនៅថ្ងៃច័ន្ទទី០២ ខែមិថុនា ឆ្នាំ១៩៥៨ ក្នុងសង្កាត់លេខ៣ នាទីក្រុងភ្នំពេញ។
– លោក ស៊ីន ច័ន្ទឆាយា ជាកូនទី២របស់លោក ស៊ីន ស៊ីសាមុត និងអ្នកស្រី ខាវ ថងញ៉ុត។
២.ការងារសិល្បៈ
– ១៩៧៩ ដល់ឆ្នាំ១៩៨៩ លោក ស៊ីន ច័ន្ទឆាយា រស់នៅ និងធ្វើការនៅខេត្តក្រចេះ
–១៩៨៩លោក ស៊ីន ច័ន្ទឆាយា ផ្លាស់មកធ្វើការនៅក្រុងភ្នំពេញ
–លោកចាប់ផ្ដើមចូលថតកាស្សែតចម្រៀងនៅពេលលោកមកទីក្រុងភ្នំពេញឲ្យផលិតកម្មខ្មែរក្រៅស្រុកមួយចំនួន។
– ១៩៩៣ លោក ស៊ីន ច័ន្ទឆាយា បានផ្អាកដោយសារលោកមានជំងឺហើមបំពង់សំឡេង ដោយទទួលការណែនាំពីវេជ្ជបណ្ឌិតឲ្យលោកឈប់ច្រៀងជាបណ្ដោះអាសន្ន។
– ថ្វីត្បិតតែ លោក ស៊ីន ច័ន្ទឆាយា មិនបានទទួលការណែនាំបង្ហាត់បង្រៀននូវបទពិសោធន៍ល្អៗក្នុងការ ច្រៀងពីឳពុកលោកមែន ប៉ុន្តែមត៌កឈាមជ័រសិល្បៈដែលលោកឆាយាបានមកពី លោក ស៊ីន ស៊ីសាមុត ជាឳពុក គួបផ្សំជាមួយ ទេពកោសល្យផ្ទាល់ខ្លួនពីកំណើត លោក ស៊ីន ច័ន្ទឆាយា ក៏ចេះច្រៀងពីរោះម្យ៉ាង ទៅតាមសំឡេងធម្មជាតិរបស់លោក។
៣.ការតស៊ូចុះកម្មសិទ្ធិបញ្ញា
– លោក ស៊ីន ច័ន្ទឆាយា រួមជាមួយអ្នកម្ដាយរបស់លោកអ្នកស្រី ខាវ ថងញ៉ុត និងក្រុមគ្រួសារ បានខិតខំតស៊ូដើម្បីធ្វើការចុះបញ្ជីបទចម្រៀងដែលជាកម្មសិទ្ធិ បញ្ញារបស់បិតាលោក គឺអធិរាជសំឡេងមាស ស៊ីន ស៊ីសាមុត ។ រហូតមកដល់ថ្ងៃទី១៧ ខែធ្នូ ឆ្នាំ២០១៤ ក្រសួងពាណិជ្ជកម្ម និងក្រសួងវប្បធម៌ និងវិចិត្រសិល្បៈ បានសម្រេចប្រគល់បទចម្រៀង ៧៣ បទ របស់អធិរាជសំឡេងមាស លោក ស៊ីន ស៊ីសាមុត ជូនដល់គ្រួសាររបស់ លោក ស៊ីន ស៊ីសាមុត ក្នុងការទទួលបានច្បាប់កម្មសិទ្ធិបញ្ញា។
–លោក ស៊ីន ច័ន្ទឆាយា បានរៀបការជាមួយអ្នកស្រី សំ សាន។ ភរិយារបស់លោក ស៊ីន ច័ន្ទឆាយា ក៏បានបម្រើសិល្បៈចម្រៀងដែរ ក្នុងឆ្នាំ១៩៧៩ ដល់ ឆ្នាំ១៩៨៩។ អ្នកទាំងពីរមានកូន៣នាក់ គឺកូនប្រុស២នាក់ និងកូនស្រីម្នាក់។
៤.មរណភាព
– លោក ស៊ីន ច័ន្ទឆាយា បានទទួលមរណភាពនៅថ្ងៃអង្គារ ទី២០ ខែមករា ឆ្នាំ២០១៥ វេលាប្រមាណជាង១១ថ្ងៃត្រង់ ក្នុងអាយុ៥៧ឆ្នាំ ដោយសារកើតខ្យល់គ ដួលនៅខាងមុខសមាគម ស៊ីន ស៊ីសាមុត។ លោក ស៊ីន ច័ន្ទឆាយា មានជំងឺលើសឈាម និងទឹកនោមផ្អែមប្រចាំកាយ។
– លោក សុះ ម៉ាច ប្រធានសមាគមសិល្បករខ្មែរបានឲ្យដឹងថា មុនកើតហេតុ លោក ស៊ីន ច័ន្ទឆាយា បានអញ្ជើញទៅផឹកកាហ្វេនៅក្បែរផ្ទះដូចសព្វមួយដង។ ក្រោយត្រឡប់ពីផឹកកាហ្វេចូលដល់ក្នុងផ្ទះ ស្រាប់តែរអិលជើងដួលបោកក្បាលដាច់សរសៃឈាមស្លាប់តែម្តង។ សពរបស់លោក ស៊ីន ច័ន្ទឆាយា ត្រូវបានតម្កល់ធ្វើបុណ្យនៅក្នុងគេហដ្ឋានស្ថិតក្នុងសង្កាត់ទឹកល្អក់ទឹកទី៣ ខណ្ឌទួលគោក រាជធានីភ្នំពេញ៕
