រាជធានីភ្នំពេញ៖សម្តេច ស ខេង បានធ្វើការបកអាក្រាតកេរ្តិ៍ចៅហ្វាយខេត្តរតនគិរីជាថ្មីម្តងទៀត តាមរយៈដែលសម្តេចប្រាប់ចៅហ្វាយខេត្តទាំងអស់ថា កុំឲ្យមានរឿងដូចអភិបាលខេត្តរតនគិរី។
ការថ្លែងរបស់សម្តេច ស ខេង ធ្វើឡើងក្នុងឱកាសបើកកិច្ចប្រជុំលើកទី១៣ របស់គណៈកម្មាធិការជាតិសម្រាប់ការអភិវឌ្ឍ តាមបែបលទ្ធប្រជាធិបតេយ្យនៅថ្នាក់ក្រោមជាតិ នៅព្រឹកថ្ងៃទី០៤ ខែមករា ឆ្នាំ២០១៧នេះ នៅទីស្តីការក្រសួង។
សូមបញ្ជាក់ថា នៅក្នុងកិច្ចប្រជុំបូកសរុបលទ្ធផលការងារឆ្នាំ២០១៦ និងលើកទិសដៅឆ្នាំ២០១៧ របស់គណៈកម្មាធិការសុវត្ថិភាពចរាចរណ៍ផ្លូវគោក នាពេលកន្លងទៅ សម្តេចក្រឡាហោម ស ខេង បានថ្លែងស្តីបន្ទោសធ្ងន់ៗលើអភិបាលខេត្តរតនគិរី លោក ថង សាវុន ដោយសារតែអភិបាលខេត្តរូបនេះ បានយកឈ្មោះសម្តេចទៅបោករដ្ឋមន្ត្រី៣រូប ដើម្បីគេចវេសពីការងារ។
សម្តេចក្រឡាហោម ស ខេង បានរំលឹកថា កាលពីថ្ងៃទី២៩ ខែធ្នូ ឆ្នាំ២០១៦ កន្លងទៅ មានរដ្ឋមន្ត្រី ៣រូប រួមមានលោកទេសរដ្ឋមន្ត្រី ជា សុផារ៉ា រដ្ឋមន្ត្រីក្រសួងដែន នគរូបនីយកម្ម និងសំណង់ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និង នេសាទ និងលោក សាយ សំអាល់ រដ្ឋមន្ត្រីក្រសួងបរិស្ថាន ចុះទៅដោះស្រាយបញ្ហាដីធ្លីជូនប្រជាពលរដ្ឋនៅក្នុងខេត្តរតនគិរី។
ក្នុងដំណើរចុះទៅដោះស្រាយបញ្ហាដីធ្លីជូនប្រជាពលរដ្ឋពីសំណាក់រដ្ឋមន្ត្រីទាំង ៣រូបនេះ មិនមានការចូលរួមពីលោកអភិបាលខេត្តរតនគិរី ថង សាវុន នោះឡើយ។ ដោយអភិបាលខេត្តយកលេសថា ជាប់ប្រជុំជា មួយសម្តេចក្រឡាហោម ស ខេង ។ ប៉ុន្តែសម្តេចថា ក្នុងរយៈពេលប៉ុន្មានថ្ងៃចុងក្រោយនេះ គឺសម្តេចគ្មានកិច្ចប្រជុំណាមួយជាមួយលោកអភិបាលខេត្តរតនគិរីនោះឡើយ៕
