ដោយ៖ប៉ែន សុផល
បាត់ដំបង៖លោក ថៃ នរៈពិទូ រួមនិងបក្ខពួក៥នាក់ផ្សេងទៀតត្រូវបានការិយាល័យប្រឆាំងគ្រឿងញៀនខេត្តបញ្ជូនខ្លួនទៅកាន់តុលាកានៅវេលាព្រឹកថ្ងៃទី១២ ខែមករា ឆ្នាំ២០១៧នេះពាក់ព័ន្ធករណីប្រើប្រាស់ ជួញដូរ និងមានឧបករណ៍ផលិតកែច្នៃថ្នាំញៀន ។
លោក ស៊ាន សុណាល់ នាយការិយាល័យប្រឆាំងគ្រឿងញៀនខេត្តបាននិយាយអោយដឹងនៅព្រឹកមិញនេះថា លោក ថៃ នរៈពិទូ រួមនិងបក្ខពួកផ្សេងទៀតត្រូវបានបញ្ជូនទៅតុលាការ ហើយនៅព្រឹកមិញនេះដោយពាក់ព័ន្ធទៅនឹងការប្រើប្រាស់ ជួញដូរ និងមានឧបករណ៍ ផលិត កែច្នៃ ថ្នាំញៀនដោយខុសច្បាប់។
លោកបន្តថា ឧបករណ៍ផលិតកែច្នៃចេញជាថ្នាំញៀនប្រភេទ(ឌីយ៉ាស៊ីបាំ)ថ្នាំនេះមានប្រភេទគ្រាប់និងទឹកប្រើប្រាស់សំរាប់លាយចូលក្នុងកាហ្វេ កូកា ស្រាបៀ និងស្រាវីស្គី សំរាប់បង្វក់អារម្មណ៍ស្រីៗ ធ្វើអោយមានអារម្មណ៍ផ្លូវភេទ និងរវើរវាយ។
គួរបញ្ជាក់ផងដែរថា ជនសង្ស័យខាងលើត្រូវបានសមត្ថកិច្ចចាប់ឃាត់ខ្លួនកាលពីថ្ងៃទី៩ ខែមករាឆ្នាំ២០១៧វេលាម៉ោង២៣-២០នាទីដោយកម្លាំងការិយាល័យប្រឆាំងគ្រឿងញៀនបានសហការជាមួយកម្លាំងបង្ការបង្ក្រាបរួមនិងកម្លាំងអន្តរាគមន៍ប្រឆាំងបទល្មើសនៃស្នងការដ្ឋាននគរបាលខេត្តបាត់ដំបងនៅចំណុចខារ៉ាអូខេ យីហោ ដឺសោន ហ្វាមីលី ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង។
លោកនិយាយទៀតថា ជនសង្ស័យទាំង៦នាក់ ទី១ឈ្មោះ ហេង យូសុង ភេទប្រុសអាយុ២៤ឆ្នាំរស់នៅភូមិ១៣មករា សង្កាត់ព្រែកព្រះស្តេច ក្រុងបាត់ដំបង។ ទី២ឈ្មោះ ថៃ នរ ពិទូ ភេទប្រុសអាយុ៣២ឆ្នាំរស់នៅភូមិអូរឬស្សី២ ខណ្ឌប្រាំពីរមករា រាជធានីភ្នំពេញ។ ទី៣ឈ្មោះ ភា ប៊ុនហេង ភេទប្រុសអាយុ៣២ឆ្នាំរស់នៅភូមិព្រែកព្រះស្តេច សង្កាត់ព្រែកព្រះស្តេច ក្រុងបាត់ដំបង។ ទី៤ឈ្មោះ ហាប់ សុវត្ថិ ភេទប្រុសអាយុ២៩ឆ្នាំរស់នៅក្រុងបាត់ដំបង។ ទី៥ឈ្មោះ អោក រតនះ ប៉ុណ្ណិកា ភេទស្រីអាយុ២៧ឆ្នាំរស់នៅសង្កាត់បឹងកក់២ ខណ្ឌទួលគោក រាជធានីភ្នំពេញ។ ទី៦ឈ្មោះ ហ៊ុន ម៉ាណេ ភេទស្រីអាយុ២៧ឆ្នាំស្នាក់នៅបន្ទប់ជួល ក្នុងភូមិរំចេក៤ សង្កាត់រតនះ ក្រុងបាត់ដំបង។
វត្ថុតាងរួមមាន ថ្នាំញៀនប្រភេទកេតាមីន(KETAMINEខេ )ចំនួន៣ថង់ទម្ងន់០,៨៨ក្រាម។ ឧបករណ៍(ពុម្ភ)សំរាប់កែច្នៃថ្នាំញៀនអ៊ិចស្តាស៊ីចំនួន២។ ថ្នាំអំពូលDiazepamចំនួន២អំពូល។ ថ្នាំគ្រាប់ZEPAMចំនួន១៦បន្ទះ និងសម្ភារៈវិចខ្ចប់ថ្នាំញៀនមួយចំនួនទៀត។
បច្ចុប្បន្នជនសង្ស័យពាក់ព័ន្ធខាងលើរួមនិងវត្ថុតាងត្រូវបានការិយាល័យជំនាញបញ្ជូនខ្លួនទៅតុលាការ នៅព្រឹកថ្ងៃទី១២ ខែមករា ឆ្នាំ២០១៧នេះ៕
