ដោយ៖ប៉ែន សុផល
បាត់ដំបង៖ប្រជាពលរដ្ឋជាច្រើនដែលរស់នៅក្នុងភូមិព្រែកព្រះស្តេច សង្កាត់ព្រែកព្រះស្តេចបានរិះគន់ខ្លាំងៗទៅលើអាជ្ញាធរខេត្តបាត់ដំបងថា បានឃុបឃិតគ្នាកាត់ដីក្នុង (វិមានសព)លក់។
ប្រជាពលរដ្ឋបាននិយាយលើកឡើងថា ដីក្នុង(វិមានសព)ជាទីកន្លែងសំរាប់តម្កល់សាកសពរបស់បុព្វបុរសខ្មែរដែលបានបូជាឈាមស្រស់សាច់ស្រស់នៅក្នុងសមរភូមិកាលពីសម័យសង្គ្រាមដែលមានទីតាំងស្ថិតក្នុងភូមិព្រែកព្រះស្តេច សង្កាត់ព្រែកព្រះស្តេច ក្រុងបាត់ដំបងពេលនេះត្រូវបានអាជ្ញាធរខេត្តបាត់ដំបងឃុបឃិតគ្នាពុះកាត់ជាពីរដើម្បីយកដីលក់។
ពាក់ព័ន្ធទៅនឹងការរិះគន់លើកឡើងរបស់ប្រជាពលរដ្ឋខាងលើនេះដែរ លោក តោ ហុន ចៅសង្កាត់ព្រែកព្រះស្តេច បានប្រាប់សារព័ត៌មានយើងកាលពីថ្ងៃទី១៨ ខែមករា ឆ្នាំ២០១៧នេះថា៖រឿងកាត់ពុះដីនៅក្នុង (វិមានសព)លក់គឺពលរដ្ឋចេះតែនិយាយតៗគ្នាពីមាត់មួយទៅមាត់មួយ តែលោកក៍បានចូលរួមមើលវាស់វែងដែរប៉ុន្តែការលក់ឬមិនលក់លោកមិនបានដឹងទេព្រោះវាជារឿងរបស់ថ្នាក់លើ។
ចំណែកលោក សៀងឯម វ៉ូនស្ហី អភិបាលក្រុងបាត់ដំបង ក៍បានប្រាប់សារព័ត៌មានយើងកាលពីរសៀលថ្ងៃទី១៨ ខែមករាដែរថា រឿងដីនៅក្នុង(វិមានសព)គឺមិនមានការលក់ដូរដូចប្រជាពលរដ្ឋលើកឡើងនោះទេ លោកបានសួរទៅឯកឧត្ដមអភិបាលខេត្តរងលោក ងួន រតនះលោកបានប្រាប់ថា ការរៀបរបងខាន់នេះគឺផ្នែកខាងមុខគឺបានកែច្នៃធ្វើរមណីយដ្ឋានទេសចរណ៍(វិមានសព)ដោយតុបតែងធ្វើជា សួនច្បារ អាងហែលទឹក កន្លែងហាត់ប្រាណ និងធ្វើជាស្តូកតម្កល់អថិធាតុសំរាប់គោរព វិញ្ញាណក្ខន្ធ។ ដោយឡែកផ្នែកខាងក្រោយគឺមានគម្រោងធ្វើជាឧទ្យាន ដោយប្រមូលយកដើមឈើណាដែលកម្រយកមកដាំជាការលំអរ៕
