ភ្នំពេញ៖ស្ត្រីម្នាក់បានស្លាប់ភ្លាមៗនៅនឹងកន្លែង ចំណែកម្នាក់ទៀតបានរងរបួសធ្ងន់ធ្ងរត្រូវបានដឹកបញ្ជូនទៅ ទៅសង្គ្រោះបន្ទាន់ភ្លាមៗ ដោយសារតែរថយន្តដឹកឥដ្ឋ១គ្រឿង បើកបរក្នុងល្បឿនយ៉ាងលឿន បានជ្រុលទៅ បុកនិងកិននៅក្នុងខណៈពេលដែលពួក នាងកំពុងជិះម៉ូតូ១គ្រឿងឌុបគ្នា៣នាក់ ធ្វើដំណើរក្នុងទិសដៅច្រាស់ គ្នាហើយពេលទៅដល់ត្រង់ចំណុចផ្លូវបំបែងស្តុប រថយន្តធុនយក្សនេះ មិនបានបន្ថយល្បឿនទេ ទោះបីជាឃើញស្តុបឈប់អោយ អ្នកជិះម៉ូតូកំពុងឆ្លងកាត់ពីមុខទេ ទើបបង្កគ្រោះថ្នាក់បែបនេះ បន្ទាប់មកអ្នកបើកបរ រថយន្តបង្កខាងលើបាន ចុះរត់គេចខ្លួនបាត់ស្រមោល។
ឧប្បត្តិហេតុគ្រោះថ្នាក់ចរាចរដ៏រន្ធត់នោះ បានកើតឡើងកាលពីវេលាម៉ោង៦និង៣០នាទី ព្រឹកថ្ងៃទី២២ ខែកុម្ភៈ ឆ្នាំ២០១៧ នៅលើកំណាត់ផ្លូវលេខ២០០៤ ត្រង់ចំណុចកែងផ្លូវវត្តអង្គតាមិញ ស្ថិតនៅក្នុងភូមិត្រពាំងល្វា សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។
ស្ត្រីរងគ្រោះដែលស្លាប់នោះឈ្មោះ ឡុង សែន អាយុប្រហែល៣០ឆ្នាំ មុខរបរកម្មការិនីរោងចក្រកាត់ដេរ សម្លៀកបំពាក់ យីហោ 《វ៉ាសថ៍ អឹភែរឹល ខេមបូឌា》ចំណែកស្ត្រីម្នាក់ទៀត ដែលរងរបួសធ្ងន់នោះឈ្មោះ សាត សុខេម អាយុ៣៨ឆ្នាំមុខរបរជាកម្មការិនីរោងចក្រជាមួយគ្នា និងត្រូវជាមិត្តភក្ដិជាមួយអ្នកស្លាប់។ នាក់៣ស្នាក់នៅបន្ទប់ក្បែរគ្នាក្នុងភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ។ ចំណែកបុរសម្នាក់ ដែលជាអ្នកឌុបឈ្មោះ ផាត វ័ន អាយុ៤៨ឆ្នាំ មុខរបររត់ម៉ូតូ ឌុបមានរបួសស្រាល ហើយបុរសនេះត្រូវជាប្ដីរបស់ស្ត្រីដែលរងរបួសធ្ងន់នោះ អ្នកទាំងបីនាក់នោះ ជិះម៉ូតូ ម៉ាកហុងដាឌ្រីមសេ១២៥ មួយគ្រឿងពណ៏ខ្មៅ ពាក់ស្លាកលេខភ្នំពេញ1AL-1623។ ដោយឡែករថយន្ត បង្កម៉ាក FUSO ពណ៏សពាក់ស្លាកលេខភ្នពេញ3C-1352 ជារថយន្តដឹកឥដ្ឋ ហើយអ្នកបើកបររត់បាត់ ស្រមោល។
តាមប្រភពព័ត៌មានបានឲ្យដឹងថា នៅមុនពេលកើតហេតុ ជនរងគ្រោះទាំង៣នាក់ បានជិះម៉ូតូឌុបគ្នាធ្វើ ដំណើរក្នុងទិសដៅពីត្បូងទៅជើង ចំណែករថយន្តបង្កដឹកឥដ្ឋពេញនោះ បានបើកបរធ្វើដំណើរក្នុងទិសដៅពីលិច ទៅកើតក្នុងល្បឿនយ៉ាងលឿន។ លុះពេលទៅដល់ត្រង់ចំណុចកើតហេតុ ដែលជាចំណុចផ្លូវបំបែកស្តុប រថយន្តនោះ មិនបានបន្ថយល្បឿននោះឡើយ នៅតែបើកលឿដដែល ហើយក៏បានជ្រុលទៅបុកនិងកិនអ្នកជិះម៉ូតូខាងលើ បណ្ដាលឲ្យស្លាប់ម្នាក់ និងរបួសធ្ងន់ម្នាក់តែម្ដង។ ក្រោយពេលកើតហេតុអ្នកបើកបររថយន្ត បានរត់គេចខ្លួន ទៅបាត់ស្រមោល ចំណែកអ្នករងរបួស ត្រូវបានបញ្ជូនទៅសង្គ្រោះបន្ទាន់ភ្លាមៗ ហើយសាកសពត្រូវក្រុមគ្រួសារ នាំយកទៅធ្វើបុណ្យតាមប្រពៃណី បន្ទាប់មករថយន្តបង្កនិងម៉ូតូរងគ្រោះ ត្រូវនាំយកទៅរក្សាទុកនៅ ការិយាល័យចរាចរផ្លូវគោករាជធានីភ្នំពេញ រង់ចាំការដោះស្រាយនៅពេលក្រោយ៕
