គូឡាឡាំពួរ៖នាយករដ្ឋមន្ត្រីម៉ាឡេស៊ីលោក ណាជីប រ៉ាហ្សាក់ បាននិយាយថា រដ្ឋាភិបាលម៉ាឡេស៊ីនឹងបញ្ជូនសាកសពលោក គីម ជុងណាម បញ្ជូនទៅឲ្យប្រទេសកូរ៉េខាងជើង តាមការស្នើសុំពីសំណាក់ក្រុមគ្រួសារ។ នេះបើយោងតាមទីភ្នាក់ងារព័ត៌មាន Reuters។
លោក ណាជីប បានបន្ថែមថា ការបញ្ជូនសាកសពរបស់លោក គីម ជុងណាម ទៅកាន់ប្រទេសកូរ៉េខាងជើងវិញនេះធ្វើឡើងក្រោយការបិទបញ្ចប់ការធ្វើកោសល្យវិច័យ និងតាមការស្នើសុំពីក្រុមគ្រួសារលោក គីម។ ទន្ទឹមនោះលោកនាយករដ្ឋមន្ត្រីក៏បានបញ្ជាក់ថា ជនជាតិម៉ាឡេស៊ីដែលជាប់គាំងក៏ត្រូវបានអនុញ្ញាតឲ្យចាកចេញពីកូរ៉េខាងជើង ស្របពេលដែលជនជាតិកូរ៉េខាងជើងនៅម៉ាឡេស៊ី ក៏ត្រូវបានអនុញ្ញាតឲ្យវិលត្រឡប់ទៅមាតុប្រទេសវិញដូចគ្នាដែរ។
គួរបញ្ជាក់ថា លោក គីម ជុងណាម ដែលត្រូវជាបងប្រុសម្តាយទីទៃរបស់លោក គីម ជុងអ៊ុន មេដឹកនាំកំពូលនៃរបបដឹកនាំទីក្រុងព្យុងយ៉ាងត្រូវបានគេលួចធ្វើឃាតនៅឯអាកាសយានដ្ឋានអន្តជាតិគូឡាឡាំពួ កាលពីថ្ងៃទី១៣ ខែកុម្ភៈកន្លងទៅ ដោយការប្រើប្រាស់សារធាតុគីមីពុលម្យ៉ាងមានឈ្មោះថា VX៕
