បណ្តឹងនៅក្រៅឃុំរបស់លោក នី ចរិយា ត្រូវបរាជ័យ
រាជធានីភ្នំពេញ៖នៅព្រឹកថ្ងៃទី៣១ ខែមីនា ឆ្នាំ២០១៧ តុលាការកំពូលបានច្រានចោលសំណើសុំនៅក្រៅឃុំរបស់លោក នី ចរិយា អគ្គលេខាធិការរងគណៈកម្មាធិការជាតិរៀបចំការបោះឆ្នោត (គ.ជ.ប)។
មេធាវីការពារក្ដីលោក នី ចរិយា លោក សំ សុគង់ បានបញ្ជាក់ប្រាប់ក្រុមអ្នកសារព័ត៌មានថា តុលាការកំពូលបានច្រានចោល ចំពោះសំណើនៅក្រៅឃុំនេះហើយ។ លោកបញ្ជាក់ថា មូលហេតុសំខាន់ដែលតុលាការកំពូលមិនអនុញ្ញាតឲ្យនៅក្រៅឃុំនេះ ដោយសារលោក នី ចរិយា ជាប់ចោទពីបទសមគំនិតក្នុងអំពើសូកប៉ាន់សាក្សីដែលជាបទល្មើសឧក្រិដ្ឋ។
គួរបញ្ជាក់ថា លោក នី ចរិយា ជាប់ចោទពីបទ «សមគំនិតក្នុងអំពើសូកប៉ាន់សាក្សី» ប្រព្រឹត្តនៅរាជធានីភ្នំពេញ កាលពីអំឡុងខែមីនា ខែមេសា ឆ្នាំ២០១៦ តាមមាត្រា២៩និងមាត្រា៥៤៨ នៃក្រមព្រហ្មទណ្ឌ៕
