លិចទូកដឹកជនភៀសខ្លួននៅសមុទ្រមេឌីទែរ៉ាណេ បាត់ខ្លួន៨០នាក់
លីប៊ី៖ទូកដឹកជនភៀសខ្លួនមួយគ្រឿងបានលិចចូលទៅក្នុងផ្ទៃសមុទ្រ ក្បែរឆ្នេរនៃប្រទេសលីប៊ីបណ្តាលឲ្យមនុស្សយ៉ាងហោចណាស់៨០នាក់ រួមមានទាំងស្ត្រី និងកុមារបាត់ខ្លួន។ នេះបើតាមការចេញផ្សាយដោយសារទីភ្នាក់ងារព័ត៌មានចិន ស៊ិនហួរ។
ប្រភពដដែលបញ្ជាក់ថា មនុស្សសរុបចំនួន១៣២នាក់ បានឡើងជិះធ្វើដំណើរនៅលើទូកខ្យល់មួយគ្រឿង កាលពីថ្ងៃសុក្រសប្តាហ៍មុននេះ ក៏ប៉ុន្តែវាក៏បានចាប់ផ្តើមលិចចូលទៅក្នុងផ្ទៃទឹកបន្តិចម្តងៗ នៅប៉ុន្មានម៉ោងក្រោយមក ហើយមានអ្នកនៅរស់រានមានជីវិតប្រមាណតែ៥០នាក់ប៉ុណ្ណោះ ត្រូវបានជួយសង្គ្រោះដោយកប៉ាល់ពាណិជ្ជកម្មមួយគ្រឿង ដែលបានដឹកពួកគេទាំងនោះមកទម្លាក់នៅតំបន់ Sicily ភាគខាងត្បូងប្រទេសអ៊ីតាលីនាថ្ងៃអាទិត្យ៕
