រាជធានីភ្នំពេញ៖ស្ថិតក្នុងឯកសណ្ឋាននាយទាហានផុតលេខផ្កាយមាស៥ សម្តេច ហ៊ុន សែន នាយករដ្ឋមន្ត្រីកម្ពុជា បានធ្វើការព្រមានខ្លាំងៗ ទៅលើបក្សប្រឆាំង ប្រសិនបើពូកគេនៅតែធ្វើសកម្មភាពនិងញុះញង់បង្កហឹង្សាដូចកាលបោះឆ្នោតឆ្នាំ២០១៣ កន្លងទៅ។ សម្តេចបញ្ជាក់ថា បើពួកគេនៅតែបន្តធ្វើសកម្មភាពខាងលើនេះ នៅមុននិងក្រោយការបោះឆ្នោត ឆ្នាំ២០១៧-២០១៨ នោះពួកគេនិងប្រឈមការបង្ក្រាបដោយមិនលើកឡែងនោះឡើយ។
សម្តេច ហ៊ុន សែន បានថ្លែងដូច្នេះ នៅក្នុងទិវា អតីតយុទ្ធជនកម្ពុជា នាព្រឹកថ្ងៃទី១០ ខែឧសភា ឆ្នាំ២០១៧ នេះ នៅកោះពេជ្រ ខណដែលឱកាសនោះសម្តេចក៏បានផ្តល់ជូនថវិកា២០ម៉ឺនរៀលសម្រាប់អតីតយុទ្ធជនផងដែរ។
សម្តេច ហ៊ុន សែន បានថ្លែងថា កាលពីមុននិងក្រោយការបោះឆ្នោតឆ្នាំ២០១៣ គណបក្សប្រឆាំងបានធ្វើសកម្មភាព ញុះញង់បង្កហឹង្សា ដូចជាកាលរារាំងការបោះឆ្នោត ការដុតបំផ្លាញរថយន្តសមត្ថកិច្ច ការប្រមូលផ្តុំធ្វើបាតុកម្មហឹង្សា រួមទាំងសកម្មភាពជាច្រើនទៀតប្រឆាំងរាជរដ្ឋាភិបាល។ ប៉ុន្តែរាជរដ្ឋាភិបាលបាន ខិតខំអត់ធ្មត់ ព្រោះតែចង់រក្សាសុវត្ថិភាព សន្តិភាព រួមទាំងឆន្ទៈបង្រួបបង្រួមជាតិ។ប៉ុន្តែនៅមុននិងក្រោយការបោះឆ្នោតឆ្នាំ២០១៧ -២០១៨ ខាងមុខនេះ រាជរដ្ឋាភិបាលនិងមិនបណ្តាយឲ្យក្រុមបក្សប្រឆាំងធ្វើសកម្មភាពបង្កហឹង្សាដូចកាលបោះឆ្នោតឆ្នាំ២០១៣នោះឡើយ។ សម្តេចបញ្ជាក់ថា នឹងប្រើកម្លាំងប្រដាប់អាវុធ បង្រាបសកម្មភាពទាំងអស់នោះ។
សម្តេចនាយករដ្ឋមន្ត្រីបានសង្កត់ធ្ងន់ថា រាល់សកម្មភាពរបស់បក្សប្រឆាំងនាពេលកន្លងមកបានបង្ហាញយ៉ាងច្បាស់ថា ពួកគេចង់បំផ្លាញនូវសេចក្តីសុខរបស់ប្រជាពលរដ្ឋកម្ពុជា សំខាន់បំផ្លាញសន្តិភាពដែលយើងទាំងអស់គ្នា ខិតខំរកបានដោយលំបាក។ដូច្នេះយើងនឹងមិនបណ្តាយឲ្យពួកគេបន្តធ្វើសកម្មភាពបែបញុះញង់បង្កសង្គ្រាម បំផ្លាញសន្តិភាពនោះឡើយ។
យ៉ាងណាក៏ដោយសម្តេចបានអះអាងថា គណបក្សប្រជាជនកម្ពុជា និងឈ្នះឆ្នោតនៅគ្រប់ការបោះឆ្នោតជារៀងរហូតទៅ ព្រោះថា ប្រជាពលរដ្ឋភាគច្រើនលើសលប់នៅតែបន្តគាំទ្រការដឹកនាំដ៏ត្រឹមត្រូវរបស់គណបក្សប្រជាជនកម្ពុជា ដោយហេតុថា អ្វីៗដែលមាននៅពេលនេះ រួមទាំងសន្តិភាពផងគឺជាស្នាដៃរបស់គណបក្សប្រជាជនកម្ពុជា៕
