ដោយ ៖ ប៉ែន សុផល
ខេត្តបាត់ដំបង ៖ ក្មេងប្រុសជាបងប្អូនបង្កើតនឹងគ្នា២នាក់បានឆក់ខ្សែរភ្លើងបណ្តាលអោយម្នាក់ស្លាប់និងម្នាក់ទៀតរងរបួស។ ហេតុការណ៍គួរអោយភ្ញាក់ផ្អើលខាងលើនេះបានកើតឡើងនៅវេលាម៉ោង៨ និង០០នាទី ថ្ងៃទី២៣ ខែឧសភាឆ្នាំ២០១៧នៅត្រង់ចំណុចភូមិកាប់ព្រិច ឃុំព្រះផុស ស្រុកគាស់ក្រឡ។
សមត្ថកិច្ចប្រាប់អោយដឹងថា ក្មេងប្រុសដែលត្រូវបានខ្សែរភ្លើងឆក់រួមមាន៖ ទី១ឈ្មោះអ៊ាត រដ្ឋា ភេទប្រុស អាយុ១៦ឆ្នាំមុខរបរធ្វើស្រែ(ស្លាប់)។ ទី២ឈ្មោះអ៊ាត រិទ្ធី ភេទប្រុស អាយុ១៣ឆ្នាំត្រូវជាប្អូនបង្កើត(រងរបួស)ទាំងពីរនាក់រស់នៅក្នុងភូមិកាប់ព្រិច ឃុំព្រះផុស ស្រុកគាស់ក្រឡ។
ប្រភពពីសាច់ញាតិក្មេងរងគ្រោះបានប្រាប់ថា នៅមុនពេលកើតហេតុក្មេងរងគ្រោះទាំងពីរនាក់បងប្អូនបាននាំគ្នាទៅបើកទ្វារក្រោលគោដើម្បីបញ្ចេញគោអោយទៅស៊ីស្មៅចៃដន្យខ្សែភ្លើងដែលតរត់កាត់លើដំបូលក្រោលគោមានដំណរប៉ះទៅនឹងស័ង្គសីបណ្តាលអោយឆ្លងឆក់ស្លាប់និងរបួសតែម្តង។
បច្ចុប្បន្នសពក្មេងរងគ្រោះត្រូវបានក្រុមគ្រួសារយករៀបចំធ្វើបុណ្យតាមប្រពៃណី ចំណែកអ្នក រងរបួសបាននិងកំពុងសំរាព្យាបាលនៅផ្ទះបន្ត៕
