អង់គ្លេស ៖ ថ្នាក់ដឹកនាំអង់គ្លេសបានបានផ្ទុះកំហឹងចំពោះប្រព័ន្ធផ្សព្វផ្សាយអាមេរិកដែលបានដាក់បង្ហាញរូបភាពជាភស្តុតាងកំពុងស្ថិតនៅក្រោមការងារស៊ើបអង្កេតរកអ្នកពាក់ព័ន្ធផ្សេងទៀតករណីវាយប្រហារនៅ Manchester Arena កាលពីថ្ងៃចន្ទ ដោយអះអាងថាបានធ្វើឲ្យប៉ញពាល់ដល់ដំណើរការស៊ើបអង្កេត។
ការផ្ទុះកំហឹងនេះកើតឡើងបន្ទាប់សារព័ត៌មានអាមេរិក New York Times បានទៅចុះផ្សាយដាក់បង្ហាញរូបភាពជាភស្តុតាងដែលកំពុងស្ថិតនៅក្រោមការងារស៊ើបអង្កេតរបស់សមត្ថកិច្ច។
នាយករដ្ឋមន្ត្រីអង់គ្លេសថ្លែងថា លោកស្រី នឹងលើកយកបញ្ហាធ្វើឲ្យលេចធ្លាយភស្តុតាងការវាយប្រហារនេះ ទៅជជែកជាមួយលោកត្រាំនៅពេលប្រជុំកំពូលជាមួយអង្គការណាតូ។ ចំណែករដ្ឋមន្ត្រីក្រសួងមហាផ្ទៃរបស់របស់អង់គ្លេសលោកស្រី Amber Rudd ថ្លែងថាលោកស្រី ខឹងខ្លាំងចំពោះការធ្វើឲ្យលេចធ្លាយភស្តុតាងទាំងនេះ ហើយលោកស្រីព្រមានមិនត្រូវឲ្យមានករណីបែបនេះកើតឡើងម្តងទៀតនោះទេ។
គួរបញ្ជាក់ថា រហូតដល់ថ្ងៃព្រហស្បតិ៍ម្សិលមិញនេះបុរស៧នាក់ និងស្ត្រីម្នាក់ត្រូវបានចាប់ខ្លួនសង្ស័យពាក់ព័ន្ធការវាយប្រហារគ្រាប់បែក នៅកន្លែងប្រគំតន្ត្រីមួយនៅក្នុងទីក្រុង Manchester របស់អង់គ្លេស កាលពីយប់ថ្ងៃចន្ទ ដែលបានបណ្តាលមនុស្ស២២នាក់ស្លាប់ និង ៦៤នាក់រងរបួស៕
