ដោយ ៖ ប៉ែន សុផល
បាត់ដំបង ៖ សមត្ថកិច្ចឃាត់ខ្លួនមុខសញ្ញាមេធំជួញដូរគ្រឿងញៀនម្នាក់ដែលមានប្រវត្តិជាប់ពន្ធនាគារម្តងកាលពីឆ្នាំ២០១៣។
លោកវ៉ាង ពិសិដ្ឋ នាយការិយាល័យប្រឆាំងគ្រឿងញៀននៃទីបញ្ជាការកងរាជអាវុធហត្ថខេត្តបាត់ដំបងបានបញ្ជាក់អោយ មេគង្គប៉ុស្តិ៍ដឹងថា នៅក្នុងប្រតិបត្តិការបង្ក្រាបខាងលើជនសង្ស័យបានរក្សាទុកនូវគ្រឿងញៀនជាច្រើន ខណះដែលកម្លាំងការិយាល័យជំនាញតាមប្រមាញ់ប្រកៀកប្រកិតជនសង្ស័យបានបាចគ្រឿងញៀនចោលអស់ជាច្រើនទៅក្នុងព្រៃតាមដងផ្លូវ។
នាយការិយាល័យប្រឆាំងគ្រឿងញៀនបានបន្តថា ការបង្ក្រាបនេះធ្វើឡើងកាលពីថ្ងៃទី៧ ខៃមិថុនា ឆ្នាំ២០១៧ នៅក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ក្នុងនោះកម្លាំងបង្ក្រាបឃាត់ខ្លួនបានជនសង្ស័យម្នាក់ឈ្មោះអៀង សុខឿន ភេទប្រុស អាយុ៣៨ឆ្នាំ មុខរបរមិនពិតប្រាកដរស់នៅភូមិវត្តរំដួល សង្កាត់ចំការសំរោង ក្រុងបាត់ដំបង។
វត្ថុតាងដកហូតបាន មានម្សៅក្រាមព៌ណសថ្លាហៅម៉ាទឹកកកចំនួន៤កញ្ចប់ ទម្ងន់៣៧,៩២ក្រាម គ្រឿងញៀនប្រភេទអ៊ិចស្តាស៊ីចំនួន១០គ្រាប់កន្លះ គ្រាប់កាំភ្លើងអាកានិងគ្រាប់កាំភ្លើងខ្លីមួយចំនួនទៀតសរុបចំនួន៣៣គ្រាប់ ទូរសព្ទ័៤គ្រឿងនិងរថយន្តម៉ាកមីនីឃូពីមួយគ្រឿងផងដែរ ព៌ណទឹកប្រាក់ មានស្លាកលេខភ្នំពេញ២Y-២៧៧៦។
ជនសង្ស័យរួមទាំងវត្ថុតាងកំពុងឃាត់ខ្លួននៅការិយាល័យគ្រឿងញៀនដើម្បីកសាងសំណុំរឿងបញ្ជូនទៅកាន់តុលាការតាមនិតិវិធី៕
