ខេត្តកំពត ៖ ស្នងការនគរបាលខេត្តកំពត លោកឧត្តមសេនីយ៍ទោ ម៉ៅ ច័ន្ទមធុរិទ្ធ បានឲ្យដឹងថា ជនរងគ្រោះចំនួន២៧នាក់ ក្នុងនោះស្រី៣នាក់ បានរងរបួសធ្ងន់ស្រាល ក្នុងហេតុការណ៍ក្រឡាប់រថយន្ដក្រុង ធ្លាក់ចេញពីផ្លូវខណៈដែលពួកគេ កំពុងធ្វើដំណើរចុះពីលើ ភ្នំបូកគោ នៅខេត្តកំពត នៅរសៀលថ្ងៃទី១៩ ខែមិថុនា ឆ្នាំ២០១៧។
លោកបន្តថា ជនរងគ្រោះ គឺជាបុគ្គលិករបស់ក្រុមហ៊ុនឯកជន ផ្នែកកសិកម្មមួយនៅភ្នំពេញ ហើយពួកគេបានជួលរថយន្ដក្រុងទៅកម្សាន្ដនៅលើភ្នំបូកគោ ស្រាប់តែជួបគ្រោះថ្នាក់ចរាចរណ៍មួយនេះ នៅចំណុចគីឡូទី១០ ខណៈដែលពួកគេកំពុងធ្វើដំណើរចុះពីលើភ្នំមកហើយនោះ។ លោកបញ្ជាក់ថា ជនរងគ្រោះទាំងអស់រួមទាំងតៃកុងឡានសរុប២៧នាក់ រងរបួសធ្ងន់៦នាក់ ត្រូវបានសមត្ថកិច្ចរបស់លោក ជួយដឹកភ្លាមៗទៅកាន់មន្ទីរពេទ្យ។ សម្រាប់មូលហេតុវិញ លោកស្នងការបញ្ជាក់ថា បណ្ដាលមកពីដាច់ហ្វ្រាំង៕
