រាជធានីភ្នំពេញ ៖ សម្តេច ហ៊ុន សែន បានថ្លែងអះអាងថា ខ្មែរយើងជំនាន់ណាក៏ទៅពឹងវៀតណាម ហើយវៀតណាមក៏ពឹងកម្ពុជាដែរ ជាក់ស្តែង សម្ដេចសីហនុ ក៏ធ្លាប់ពឹងវៀតណាមឲ្យជួយ លន់ នល់ ក៏ធ្លាប់ពឹងវៀតណាមខាងត្បូងឲ្យជួយដែរ ហើយមេដឹកនាំជាច្រើនបានតស៊ូ នៅក្រៅប្រទេស មិនមែនតស៊ូក្នុងប្រទេសនោះទេ ។ ចំណែកវៀតណាមក៏បានពឹងកម្ពុជាដូចគ្នា ដូច្នេះវៀតណាមមិនដែលភ្លេចអរគុណកម្ពុជា នោះទេ ។ សម្តេចបន្តថា ការពឹងទៅពឹងមកវាគឺជារឿងធម្មតា ប៉ុន្តែខ្ញុំសុំលើកឲ្យច្បាស់ កុំឲ្យមនុស្សមួយចំនួនកេងចំណេញ ។
សម្តេចបានសង្កត់ធ្ងន់ថា ការចាកចេញរបស់ ហ៊ុន សែន ទៅឲ្យវៀតណាមជួយមិនមែនមានតែ ហ៊ុន សែន ទេ ។ ប៉ុន្តែការពឹងវៀតណាមតើខុសទេ បើគ្មានវៀតណាមជួយ តើយើងអាចរំដោះប្រទេសបានទេ ។ ឥឡូវខ្ញុំបាននាំពួកឧក្រិដ្ឋជន សង្គ្រាមយកទៅកាត់ទោស បើការកាត់ទោសទទួលស្គាល់ថា ត្រឹមត្រូវ ការជួយពីវៀតណាម គ្មានអ្វីខុសទេ ៕
