ដោយ ៖ ប៉ែន សុផល
ខេត្តបាត់ដំបង ៖ សមត្ថកិច្ចបានអោយដឹងថា គ្រាប់ចំនួន២៦៣គ្រាប់ត្រូវបានពលរដ្ឋប្រទះឃើញនៅក្នុងដីខណះពេលដែលពួកគាត់កំពុងខួងរណ្តៅដាំជន្លង់ម្រេច ដែលហេតុការណ៍ខាងលើនេះបានកើតឡើងនៅវេលាម៉ោង១៣.៤៥ នាទីថ្ងៃទី២៥ ខែមិថុនា ឆ្នាំ២០១៧នៅចំណុច ចំការអូរចោតស្ថិតក្នុងភូមិស៊ុង១ ឃុំស៊ុង ស្រុកសំឡូត ខេត្តបាត់ដំបង។
សមត្ថកិច្ចបានបញ្ជាក់អោយដឹងថា គ្រាប់ទាំងចំនួន២៦៣គ្រាប់រួមមានដូចខាងក្រោម ៖ ១.គ្រាប់៨២mmចំនួន១១៣គ្រាប់ ២.គ្រាប់៦០mmចំនួន១៤៥គ្រាប់ ៣.បេ៤០ ចំនួន១គ្រាប់ ៤.គ្រាប់ដេកា៨២mmចំនួន១គ្រាប់ ៥.គ្រាប់បែកដៃចំនួន៣គ្រាប់។ សមត្ថកិច្ចបានបញ្ជាក់ទៀតថា គ្រាប់ទាំងអស់ដែលប្រទះឃើញនៅពេលនេះគឺជាគ្រាប់ដែលសេះសល់កាលពីសម័យសង្គ្រាមហើយត្រូវបានគេយកមកកប់ទុកចោលនៅក្នុងដី។
បច្ចុប្បន្នគ្រាប់ទាំងអស់នេះត្រូវបានសមត្ថកិច្ចជំនាញគាស់យករក្សាទុកនៅទីមានសុវត្ថភាពហើយខាងរដ្ឋបាលស្រុកបានទំនាក់ទំនងទៅអង្គភាពស៊ីម៉ាក់រួចហើយដើម្បីអោយចុះមកពិនិត្យមើលគុណភាពគ្រាប់់នឹងយកទៅធ្វើការដុតកំទេចចោល៕
