កូឡុំប៊ី ៖ អាជ្ញាធរកូឡុំប៊ីបានឱ្យដឹងថា យ៉ាងហោចណាស់មនុស្ស០៩នាក់បានស្លាប់បាត់បង់ជីវិត និង២៨នាក់ផ្សេងទៀតកំពុងបាត់ខ្លួន បន្ទាប់ពីទូកដឹកអ្នកទេសចរដែលមនុស្សផ្ទុកមនុស្ស១៧០នាក់បានលិចនៅក្នុងបឹង Penol ស្ថិតនៅភាគពាយ័ព្យនៃប្រទេសនៅថ្ងៃអាទិត្យ (ម៉ោងនៅក្នុងតំបន់)។
ប្រធាននាយកដ្ឋានបង្ការគ្រោះមហន្តរាយកូឡុំប៊ី លោកស្រី Margarita Moncada បានបញ្ជាក់ជាបឋមថា មនុស្ស០៩នាក់បានស្លាប់ និង២៨នាក់នៅតែបន្តបាត់ខ្លួននៅឡើយ។ ចំណែកឯមនុស្ស៩៩នាក់ ត្រូវបានជួយសង្គ្រោះភ្លាមៗបន្ទាប់ពីទូកឈ្មោះ Almirante បានចាប់ផ្ដើមលិចចូលក្នុងទឹកបឹង Penol ហើយមនុស្ស៤០នាក់ផ្សេងទៀត ក៏ត្រូវបានគេស្រង់ចេញពីទឹកទាន់ពេលវេលាផងដែរ។ នេះបើតាមការចេញផ្សាយដោយសារព័ត៌មាន Russian Today នៅព្រឹកថ្ងៃចន្ទ ទី២៦ ខែមិថុនា ឆ្នាំ២០១៧។
ទោះបីយ៉ាងណាអាជ្ញាធរពុំទាន់បញ្ជាក់ពីមូលហេតុដែលបណ្ដាលឱ្យទូកដឹកភ្ញៀវទេសចរនេះលិចនៅឡើយទេ៕
