រាជធានីភ្នំពេញ ៖ ក្រុមប្រឹក្សាធម្មនុញ្ញ និងក្រសួងការពារជាតិនៅថ្ងៃទី៣១ ខែកក្កដា ឆ្នាំ២០១៧នេះបាន ប្រកាសថ្កោលទោស និងបដិសេធយ៉ាងដាច់អហង្ការ ចំពោះការមួលបង្កាច់ ដោយចេតនាទុច្ចរិតរបស់បុគ្គល ប្រ៊ែដ អាដាម នាយកប្រតិបត្តិទទួលបន្ទុកកិច្ចការតំបន់អាស៊ី របស់អង្គការឃ្លាំមើលសិទ្ធិមនុស្សអន្តរជាតិ Human Rights Watch ដែលបានលើឡើង តាមវិទ្យុអាស៊ីសេរី ធ្វើឲ្យប៉ះពាល់មកលើស្ថាប័នក្រុមប្រឹក្សាធម្មនុញ្ញ និងក្រសួងការពារជាតិ រួមទាំងស្ថាប័នកំពូលៗដទៃទៀតរបស់កម្ពុជា។
ក្រុមប្រឹក្សាធម្មនុញ្ញបានចេញនូវសេចក្តីថ្លែងការណ៍មួយនៅថ្ងៃនេះ ដោយមានខ្លឹមសារសង្កត់ធ្ងន់ថា «ការលើកឡើងរបស់ លោក ប្រ៊ែដ អាដាម នេះ ជាការរំលោភលើឯករាជ្យ អធិបតេយ្យ រំលោពលើករដ្ឋធម្មនុញ្ញ និងកិច្ចការផ្ទៃក្នុង របស់ព្រះរាជាណាចក្រកម្ពុជា ។ ទន្ទឹមនោះក្រុមប្រឹក្សាធម្មនុញ្ញសូមថ្កោលទោស និងបដិសេធយ៉ាងដាច់អហង្ការចំពោះ ការមួលបង្កាច់ដោយចេតនាទុច្ចរិតរបស់បុគ្គលនេះ ដែលបានរំលោភបំពានធ្ងន់ធ្ងរ ដល់ស្ថាប័នក្រុមប្រឹក្សាធម្មនុញ្ញ និងធ្វើឲ្យមានការភាន់ច្រឡំ ដល់សាធារណមតិជាតិ និងអន្តរជាតិ»។
ចំណែកអ្នកនាំពាក្យក្រសួងការពារជាតិ នាយឧត្តមសេនីយ៍ ឈុំ សុជាតិ ត្រូវបានសារព័ត៌មាន ក្នុងស្រុកដកស្រង់សំដីយកមកចុះផ្សាយថា ក្រសួងការពារជាតិក៏បានច្រានចោលទាំងស្រុង ចំពោះការចោទប្រកាន់គ្មានមូលដ្ឋានរបស់បុគ្គល ប្រ៊ែដ អាដាម ដោយលោកអះអាងថា កងទ័ពកម្ពុជាមានការដឹកនាំត្រឹមត្រូវ លើកិច្ចការពារសន្តិសុខ និងសណ្តាប់ធ្នាប់របស់ជាតិ គ្មានពេលវេលាទៅថតខ្សែភាពយន្តនោះឡើយ។
អ្នកនាំពាក្យរូបនោះប្រតិកម្មដូច្នេះ ខណដែលវិទ្យុអាស៊ីសេរី នៅព្រឹកថ្ងៃទី៣១ ខែកក្កដា ឆ្នាំ២០១៧នេះ បានដកស្រង់សម្តីរបស់ ប្រ៊ែដ អាដាម ដែលរិះគន់អ្នកស្រី អិនជេលីណា ជូលី ដែលថា សហការជាមួយកងយោធពលខេមរភូមិន្ទចំនួន៥០០នាក់ ដើម្បីថតភាពយន្ត «មុនដំបូងខ្មែរក្រហមសម្លាប់ប៉ារបស់ខ្ញុំ»។ ទន្ទឹមនោះវិទ្យុអាស៊ីសេរីបានប្រើពាក្យថា កងទ័ពកម្ពុជាថា ជាកងទ័ពរបស់ខ្មែរក្រហម ហើយបានរិះគន់ថា កងទ័ពបច្ចុប្បន្ននេះ បានបម្រើជនផ្តាច់ការ ហើយលោកស្រី អិនជេលីណា ជូលី មិនគួរសហការជាមួយកងទ័ពទាំងនោះទេ។
លោក ឈុំ សុជាតិ បានប្រតិកម្មថា ការលើកឡើងបែបនេះ គឺជាការប្រមាថធ្ងន់ធ្ងរ ដល់កងយោធពលខេមរភូមិន្ទ ដែលជារដ្ឋអធិបតេយ្យមួយ ដែលយើងមាន អំណាចពេញលេញ ក្នុងការបំពេញភារកិច្ចរបស់ខ្លួន។ ទោះបីជាយើងមិនបានចូលរួមថតភាពយន្តនេះ ប៉ុន្តែកងទ័ពកម្ពុជា គឺមានសិទ្ធិក្នុងការចូលរួមផ្សេងៗ។ ប្រ៊ែដ អាដាម បានតាំងខ្លួនជាអ្នកសិទ្ធិមនុស្ស ប៉ុន្តែបែរជានិយាយមាក់ងាយដល់ សិទ្ធិរបស់កងទ័ពកម្ពុជាទៅវិញ ។
អ្នកនាំពាក្យរូបនោះអះអាងថា លោកបានយល់យ៉ាងច្បាស់ អំពីគំនិតទុច្ចរឹតរបស់ លោក ប្រ៊ែដ អាដាម មកលើរាជរដ្ឋាភិបាលកម្ពុជា ដោយថា មន្ត្រីសិទ្ធិមនុស្សរូបនេះ តែងតែឆ្លៀតវាយប្រហារមកលើរាជរដ្ឋាភិបាលកម្ពុជា និងគណបក្សប្រជាជនកម្ពុជាជានិច្ច ហើយមិនដែលបានមើលឃើញនូវចំណុចល្អ របស់រាជរដ្ឋាភិបាលកម្ពុជានោះទេ ៕
