ដាម៉ាស់ ៖ សហរដ្ឋអាមេរិកបានអះអាងថា ប្រទេសកូរ៉េខាងជើងបានបង្ហាញសញ្ញាមិនស្រួលថ្មីទៀតហើយ នោះគឺការចល័តនាវាមុជទឹកខុសពីធម្មតានៅក្នុងសមុទ្រជប៉ុន។ ការអះអាងនេះធ្វើឡើងបន្ទាប់ពីការធ្វើតេស្ត និងប្រកាសជោគជ័យជាលើកទីពីរចំពោះគ្រាប់មីស៊ីលផ្លោងឆ្លងទ្វីប ICBM។ បើយោងតាមការចេញផ្សាយដោយបណ្តាញព័ត៌មាន CNN នាព្រឹកថ្ងៃអង្គារនេះ។
មន្ត្រីអាមេរិកបានលើកឡើងនៅដើមសប្តាហ៍នេះថា គេពុំទាន់អាចសន្និដ្ឋានថា ទីក្រុងព្យុងយ៉ាងបានរៀបចំធ្វើតេស្តអ្វីមួយផ្សេងទៀតនៅឡើយទេ។ ចំពោះតេស្តដែលអាមេរិកលើកឡើងនេះ គឺចង់សំដៅទៅលើការបាញ់មីស៊ីលចេញពីនាវាមុជទឹក ដោយប្រើប្រាស់បច្ចេកវិទ្យានៃប្រព័ន្ធបាញ់មីស៊ីល cold-launch system ដោយប្រើប្រាស់កម្លាំងបុកដ៏ខ្លាំងនៃចំហាយទឹក ដើម្បីរុញច្រានគ្រាប់មីស៊ីលចេញពីនាវាមុជទឹក រួចទើបមីស៊ីលផុសចេញទៅលើអាកាស បន្ទាប់មកគ្រាប់មីស៊ីលនឹងត្រូវរុញច្រានបន្តដោយចំហេះ ដែលការធ្វើបែបនេះគឺជាដើម្បីជៀសវាងការបង្កឲ្យខូចខាតដល់នាវាមុជទឹក៕
