ពោធិ៍សាត់៖ ផ្លូវសំខាន់ៗមួយចំនួននៅក្នុងក្រុង-ខេត្ដពោធិ៍សាត់បាន លិចលង់ស្ទើរទាំងស្រុងបន្ទាប់ពីមានភ្លៀងធ្លាក់មួយមេយ៉ាងធំ និងមានរយៈ ពេលជាងមួយម៉ោងកាលពីរសៀលថ្ងៃទី១០ ខែកញ្ញា ឆ្នាំ២០១៤។
នៅតាមដងវិថីក្នុងក្រុង-ខេត្ដពោធិ៍សាត់ ពិសេសផ្លូវដែលប្រជាពលរដ្ឋធ្វើចរាចរណ៍ ទៅមកបានកកស្ទះជាអន្លើៗ ខណៈ រថយន្ដ ម៉ូតូមួយចំនួន ធំបានរលត់ម៉ាស៊ីនពេលឆ្លងកាត់តាមផ្លូវដែលលិចលង់នេះ។
មិនមែនទើបតែឆ្នាំនេះទេ កន្លងទៅនៅក្រុងពោធិ៍សាត់បានលិចលង់ ហើយធ្វើឱ្យប្រជាពលរដ្ឋពិបាកធ្វើដំណើរជាខ្លាំង ។ កន្លងទៅគេបានសង្កេតឃើញ មន្ដ្រីមន្ទីរសាធារណការខេត្ដពោធិ៍សាត់ ចុះធ្វើប្រព័ន្ធលូជាហូរហែ ប៉ុន្ដែនៅមិន អាចរំដោះទឹកភ្លៀងពីក្រុងដែលមានផ្ទៃដី តូចមួយនេះបានទេ។
ពលរដ្ឋបានទទូចនិងសំណូមពរដល់លោក ម៉ៅ ធនិន អភិបាល ខេត្ដពោធិ៍សាត់គួរមានវិធាន ការកោះប្រជុំមន្ដ្រីពាក់ព័ន្ធដើម្បីរកវិធី រំដោះទឹកភ្លៀងនៅពេលដែលភ្លៀងធ្លាក់ ខ្លាំងម្ដងៗធ្វើឱ្យប្រជាពលរដ្ឋលំបាកធ្វើ ដំណើរប្រកបរបរប្រចាំថ្ងៃដូចនេះទៀត។
ប្រជាពលរដ្ឋបានរិះគន់ថា បើគិតផ្ទៃក្រឡានៅក្នុងក្រុងពោធិ៍សាត់មានទំហំប៉ុនបាតដៃ ប៉ុន្ដែភ្លៀងធ្លាក់ស្ទើរមិនដល់មួយម៉ោងផង ប្រជាពលរដ្ឋភ្នែកនៅកញ្ចឹងកព្រោះតែបារម្ភពីផ្ទះសម្បែងលិចលង់ ពិសេសកូនចៅតូចៗរបស់គាត់ដែលអាចបង្កគ្រោះថ្នាក់ដោយលង់ទឹកក៏អាចថាបានដែរ៕
