បាត់ដំបង ៖ ពលរដ្ឋខ្មែរចំនួន២នាក់ត្រូវបានថៃបាញ់អោយរងរបួសធ្ងន់ក្រោយពីពួកគេឆ្លងដែនចូលទៅធ្វើសកម្មភាពលួចមាន់ជល់នៅក្នុងទឹកដីថៃ។
លោក អួន ខុន មេប៉ុស្តិ៍នគរបាលគីឡូ៩ ស្រុកសំពៅលូនបានបញ្ជាក់ប្រាប់សារព័ត៌មានយើងនៅរសៀលថ្ងៃទី១១ ខែតុលា ឆ្នាំ២០១៧នេះថា ហេតុការណ៍ពលរដ្ឋថៃបាញ់ពលរដ្ឋខ្មែរ២នាក់អោយរងរបួសធ្ងន់ខាងលើនេះបានបង្ករការភ្ញាក់ផ្អើលកាលពីវេលាម៉ោងប្រហែល៤ទៀបភ្លឺ ថ្ងៃទី១១ ខែតុលា ឆ្នាំ២០១៧ នៅចំណុចភូមិរ៉ាសុភី ឃុំខ្លងហាត ស្រុកខ្លងហាន ខេត្តស្រះកែវ។
ពលរដ្ឋខ្មែររងគ្រោះទាំង២នាក់រួមមាន ៖ ទី១ឈ្មោះ រឿម រឹម ហៅងោលភេទប្រុស អាយុ៣០ឆ្នាំរស់នៅភូមិល្វា ឃុំបឹងបេង ស្រុកម៉ាឡៃ ខេត្តបន្ទាយមានជ័យ(របួសត្រូវជើង)។ ទី២ឈ្មោះ ស្រី ភក្តី ភេទប្រុស អាយុ២៩ឆ្នាំរស់នៅភូមិអូរល្វា ឃុំជ្រៃសីម៉ា ស្រុកសំពៅលូន ខេត្តបាត់ដំបង(របួសត្រូវជើង)។
ជនរងគ្រោះទាំង២នាក់ក្រោយពេលកើតហេតុភ្លាមៗត្រូវបានពលរដ្ឋប្រទះឃើញដេកដួលនៅលើវាលស្មៅនិងបានរាយការណ៍មកសមត្ថកិច្ចមូលដ្ឋានក្រោយមកត្រូវបានទាហានថៃដឹកយកទៅសំរាកព្យាបាលនៅក្នុងមន្ទីរពេទ្យប្រទេសថៃតែម្តង។
លោក អួន ខុន មេប៉ុស្តិ៍នគរបាលគីឡូ៩ស្រុកសំពៅលូនបានបញ្ជាក់ទៀតថា នៅមុនពេលកើតហេតុជនរងគ្រោះជាពលរដ្ឋខ្មែរទាំង២នាក់បានឆ្លងដែនចូលទៅក្នុងទឹកដីថៃហើយបានធ្វើសកម្មភាពលួចយកមាន់ជល់ហើយត្រូវបានពលរដ្ឋថៃបាញ់ដើម្បីបង្អើលមិនមែនមានបំណងបាញ់សម្លាប់នោះទេតែបណ្តាលអោយត្រូវជើងរងរបួសកកិតៗទាំង២នាក់តែម្តង។
បច្ចុប្បន្នជនរងគ្រោះទាំង២នាក់ត្រូវបានក្រុមសាច់ញាតិទៅទទួលយកត្រឡប់មកព្យាបាលបន្តនៅផ្ទះរៀងៗខ្លួនវិញហើយ៕
