បន្ទាប់ពីមានការចោទប្រកាន់ និងប្រកាសប្តឹងពីគណបក្សហ្វ៊ុនស៊ុនប៉ិច កាលពីថ្ងៃទី២១ ខែ តុលា ម្សិលមិញនេះ ពាក់ព័ន្ធទៅនឹងការប្រមាថដល់ព្រះចេស្តាព្រះមហាក្សត្រ និងប្រមាថសម្តេច ក្រុមព្រះ នរោត្តម រណឫទ្ធិ រួចមក នៅព្រឹកថ្ងៃទី២២ ខែតុលានេះ លោក លឺ ឡាយស្រេង បាន បង្ហោះសារតាមបណ្តាញសង្គម Facebook ផ្ទាល់ខ្លួនរបស់លោក ដោយទទួលស្គាល់ថា លោក បាននិយាយជ្រុលជ្រួសខ្លះៗអញ្ចឹងមែន ប៉ុន្តែលោកបានបដិសេធថា លោកគ្មានចេតនាប្រមាថដល់ ព្រះចេស្តារបស់ព្រមហាក្សត្រនោះទេ។
សូមបញ្ជាក់ថា នៅព្រឹកថ្ងៃទី ២១ ខែតុលា ឆ្នាំ២០១៧ ខ្សែវីដេអូឃ្លីបរយៈពេលជាង៤នាទី ត្រូវបាន Facebook ដែលធ្លាប់តែទម្លាយរឿងអាស្រូវរបស់អ្នកនយោបាយឈ្មោះ សីហា បាន បង្ហោះ ពីការសន្ទនារវាងលោក លឺ ឡាយស្រេង អតីតមន្ត្រីជាន់ខ្ពស់របស់គណបក្សហ្វ៊ុនស៊ិនប៉ិច ជាមួយលោកស្រី គី លំអង អតីតតំណាងរាស្ត្រគណបក្សហ្វ៊ុនស៊ិន ពាក់ព័ន្ធនឹងព្រះករុណា ព្រះ មហាក្សត្រ និងសម្តេចក្រុមព្រះនរោត្តម រណឫទ្ធិ។
លោក ញ៉េប ប៊ុនជិន អ្នកនាំពាក្យគណបក្សហ្វ៊ុនស៊ិនប៉ិច បានផ្តល់កិច្ចសម្ភាសន៍តាមទូរស័ព្ទ ជាមួយអ្នកយកព័ត៌មានទូរទស្សន៍អាស៊ីអាគ្នេយ៍ កាលពីរសៀលថ្ងៃទី២១ តុលា នេះថា លោក ទទួលបានព័ត៌មានរួចនេះហើយ គឺលោក លឺ ឡាយស្រេង បានប្រមាថព្រះចេស្តាព្រះករុណាហើយ គាត់ជេរទាំងសម្តេចក្រុមព្រះថែមទៀតផង» ។
យ៉ាងណាក៏ដោយ នៅព្រឹកថ្ងៃទី២២ ខែតុលានេះ លោក លឺ ឡាយស្រេង បានបង្ហោះសារ តាមបណ្តាញសង្គម Facebook ផ្ទាល់ខ្លួនរបស់លោក ដោយការពារចំពោះការថ្លែងសន្ទនា រវាង លោក ជាមួយនិងលោកស្រី គី លំអង ថា លោកគ្មានចេតនាប្រមាថព្រះនហាក្សត្រនោះឡើយ ។
សូមបញ្ជាក់ថា បន្ទាប់ពីបែកធ្លាយនូវព័ត៌មានស្តីពីការសន្ទនានេះ គណបក្សហ្វ៊ុនស៊ិនប៉ិច បានចោទប្រកាន់ និងប្រកាសប្តឹងលោក លឺ ឡាយស្រេង ដោយអះអាងថា បានប្រមាថព្រះចេស្តា ដ៏ធ្ងន់ធ្ងរជាចំពោះព្រះមហាក្សត្រ នរោត្តម សីហមុនី ដែលជាទីគោរពសក្ការៈ ដ៏ខ្ពង់ខ្ពស់បំផុតរបស់ រាស្ត្រខ្មែរ និងជេរប្រមាថសម្តេច ក្រុមព្រះ នរោត្តម រណប្ញទ្ធិ ព្រះប្រធានគណបក្សហ្វ៊ុនស៊ិនប៉ិច ផងដែរ៕
https://youtu.be/gkN8ZsFk69A
