សំណើសុំជួបលោក កឹម សុខា នៅពន្ធនាគារត្រពាំងផ្លុងរបស់លោក រ៉ុង ឈុន ត្រូវតុលាការបដិសេធ
រាជធានីភ្នំពេញ ៖ អ្នកនាំពាក្យនៃតំណាងអយ្យការអមសាលាដំបូងរាជធានីភ្នំពេញ ដែលបញ្ជាក់ប្រាប់ក្រុមអ្នកសារព័ត៌មានកាលពីរសៀលម្សិលមិញថា ចៅក្រមស៊ើបសួរនៃសាលាដំបូងរាជធានីភ្នំពេញបានសម្រេចមិនអនុញ្ញាតឱ្យ លោក រ៉ុង ឈុន រួមទាំងសហជីព និងតំណាងសង្គមស៊ីវិលមួយចំនួនចូលជួបលោក កឹម សុខា អតីតប្រធានគណបក្សសង្គ្រោះជាតិ នៅក្នុងពន្ធនាគារត្រពាំងផ្លុង ខេត្តត្បូងឃ្មុំនោះទេ។
សូមបញ្ជាក់ថា នៅថ្ងៃទី០៥ ខែធ្នូ ឆ្នាំ២០១៧ លោក រ៉ុង ឈុន អតីតសមាជិកគណៈកម្មាធិការរៀបចំការបោះឆ្នោត (គជប) បានដាក់លិខិតទៅសាលាដំបូងរាជធានីភ្នំពេញ ស្នើសុំជួបសួរសុខទុក្ខលោក កឹម សុខា នៅមណ្ឌលអប់រំកែប្រែទី៣ (ពន្ធនាគារត្រពាំងផ្លុង) នៅព្រឹកថ្ងៃទី១០ ខែធ្នូ ឆ្នាំ២០១៧ ខាងមុខនេះ៕
