ភ្នំពេញ ៖ ប្រជាពលរដ្ឋ ដែលទិញផ្ទះ ហើយកំពុងរស់នៅ ក្នុងបុរី ពាណិជ្ជកម្ម ជីប ម៉ុង ប្រមាណជាង ២៣៩ ល្វែងផ្ទះ ស្ថិតក្នុងភូមិទួលពង្រ សង្កាត់ចោមចៅទី១ បានស្នើឱ្យលោកអភិបាលខណ្ឌពោធិ៍សែនជ័យ ជួយធ្វើអន្តរាគម ដល់ម្ចាស់បុរីមួយនេះ ឱ្យទទួលខុសត្រូវតាមកិច្ចសន្យា ដែលខ្លួនបានអះអាងជាមួយអតិថិជន កាលពីដំបូងទី ថាធានាឱ្យបាននូវ សន្តិសុខ សុវត្ថិភាព សណ្តាប់ធ្នាប់ ភាពស្របច្បាប់ នៃកម្មសិទ្ធអចលនទ្រព្យ និង បរិស្ថានល្អ ក្នុងការរស់នៅ ដើម្បីចូលរួមអនុវត្តគោលនយោបាយភូមិឃុំមានសុវត្ថិភាពរបស់រាជរដ្ឋាភិបាល។
ប្រជាពលរដ្ឋទាំងនោះ បានលើកឡើងថា នៅប៉ុន្មានឆ្នាំចុងក្រោយនេះ ម្ចាស់បុរីខាងលើនេះ ហាក់មិនទទួលខុសត្រូវតាមកិច្ចសន្យា បណ្តោយឱ្យមានអសន្តិសុខ ក្នុងបុរី ធ្វើឱ្យការរស់នៅ មានការភ័យខ្លាច មានក្មេងទំនើងអុកឡុក មានការប្រើប្រាស់ លក់ដូរគ្រឿងញៀន និងមានអំពើតចោរកម្ម អំពើហិង្សា កើតឡើងជាញឹកញាប់។ ក្រៅពីនេះ នូវ មិនគោរពកិច្ចសន្យា ក្នុងការរក្សាអត្តសញ្ញាណបុរី ស្លាកលេខផ្ទះនិមួយៗ បណ្ណកម្មសិទ្ធអចលនទ្រព្យ និងភ្លើងបំភ្លឺផ្លូវសាធារណៈក្នុងបុរី ពេលយប់ងងឹតគួរឱ្យព្រួយបារម្មណ៍។
ការស្នើនេះ បានធ្វើឡើងកាលពីថ្ងៃ១៤ខែមករានេះ ក្នុងវេទិកាសាធារណៈរបស់រដ្ឋបាលខណ្ឌពោធិ៍សែនជ័យ និងការជួបសំណេះសំណាល ជាមួយប្រជាពលរដ្ឋ បន្ទាប់ពីទទួលបាននូវព័ត៌មានមួយចំនួន ជុំវិញក្តីកង្វល់ ក៏ដូចជាមានសំណើរ និងសំណួមពរ មួយចំនួនទៀត ដែលស្នើឱ្យរដ្ឋបាលខណ្ឌជួយដោះស្រាយនៅក្នុងបុរី ពាណិជ្ជកម្ម ជីបម៉ុងនេះ។
ជាមួយគ្នានោះដែរ ប្រជាពលរដ្ឋបានស្នើឱ្យអាជ្ញាធរខណ្ឌ ជួយកសាងផ្លូវមួយខ្សែដែលកំពុងរងការខូចខាតយ៉ាងខ្លាំង លិចទឹកនៅរដូវវស្សា ពេលយប់ងងឹតពិបាកធ្វើដំណើរ និងស្នើឱ្យស្តាប្រឡាមេមួយខ្សែ ដាក់គម្រប ដែលបច្ចុប្បន្នកំពុងរីងរាក ដោយសារសំរាម មានក្លិនស្អុយពិបាកក្នុងការរស់នៅ ប៉ះពាល់ដល់សុខភាព និងបរិស្ថានក្នុងតំបន់នេះយ៉ាងខ្លាំង។
ជាការឆ្លើយតបចំពោះមុខប្រជាពលរដ្ឋ លោក ហែម ដារិទ្ធិ អភិបាលខណ្ឌពោធិ៍សែនជ័យ បានទទួលយកនូវសំណើរ និងសំណូមពរ ទាំងអស់មកដោះស្រាយ ហើយអ្វីដែលជាតម្រូវការចាំបាច់ អាជ្ញាធរខណ្ឌ និងភាគីពាក់ព័ន្ធ នឹងដោះស្រាយឱ្យបានលឿនតាមសំណូមពរ ប៉ុន្តែមានបញ្ហាមួយចំនួនទៀត ដែលហួសពីដែនសមត្ថកិច្ចរបស់ខ្លួន រដ្ឋបាលខណ្ឌ នឹងធ្វើរបាយការណ៍ដាក់ជូនទៅអភិបាលរាជធានីភ្នំពេញ ដើម្បីពិនិត្យលទ្ធភាព និងដោះស្រាយជូន។
ជាមួយគ្នានោះ លោក ហែម ដារិទ្ធិ ស្នើឱ្យពលរដ្ឋមានការអត់ភ្មត់ និងជឿជាក់លើអាជ្ញាធរ ដើម្បីទុកពេលឱ្យអាជ្ញាធរដោះស្រាយ នូវរាល់បញ្ហា ក៏ដូចជាកង្វល់របស់បងប្អូន ក្តីព្រួយបារម្មណ៍ និងផលវិបាករបស់ប្រជាជន គឺជាភារកិច្ចរបស់ថ្នាក់ដឹកនាំគ្រប់ជាន់ថ្នាក់ ហើយរាជរដ្ឋាភិបាល មិនដែលព្រងើយ កណ្តើយម្តងណាឡើយ ចំពោះទុក្ខលំបាកក្នុងការរស់នៅរបស់ប្រជាពលរដ្ឋ៕
