ភ្នំពេញ ៖ រាជរដ្ឋាភិបាលកម្ពុជាអះអាងថា ដល់ឆ្នាំ ២០២០ ភូមិទាំងអស់ ទូទាំងកម្ពុជា នឹងមានអគ្គិសនីប្រើប្រាស់ ពីប្រភពផ្សេងៗ ហើយឆ្នាំ២០៣០ យ៉ាងហោចណាស់ ៧០% នៃលំនៅដ្ឋានទាំងអស់ ទូទាំងកម្ពុជា នឹងមានអគ្គិសនី ដែលមានគុណភាព ដូចជាអគ្គិសនី ពីបណ្តាញជាតិប្រើប្រាស់។
នេះបើតាម មន្ត្រីជាន់ខ្ពស់អាជ្ញាធរអគ្គសនីកម្ពុជាបានលើកឡើងនៅក្នុងសន្និបាតបូកសរុបការងារ បញ្ចប់ឆ្នាំ២០១៧ របស់អាជ្ញាធរអគ្គិសនីកម្ពុជា ដែលបានធ្វើឡើង កាលពីព្រឹកថ្ងៃទី ២៤ ខែមករា ឆ្នាំ២០១៨ នៅសណ្ឋាគារ សូហ្វីតែល ភ្នំពេញ ភូគីត្រា។លោក ទី នរិន្ទ ប្រធានអាជ្ញាធរ អគ្គសនីកម្ពុជាបានមានប្រសាសន៍ថា ផ្អែកលើការ អភិវឌ្ឍលើគ្រប់ វិស័យរបស់រាជរដ្ឋាភិបាល ក៏ដូចជាសន្ទុះនៃការផលិត ប្រភពអគ្គិសនី នៅក្នុងស្រុករបស់កម្ពុជា មានសន្ទុះយ៉ាងខ្លាំងក្លានារយៈពេលប៉ុន្មានឆ្នាំចុងក្រោយនេះ កម្ពុជាមានសុទដ្ឋិនិយមថា នឹងសម្រចឱ្យបានការផ្គត់ផ្គង់អគ្គិសនីមួយគ្រប់គ្រាន់ គ្រប់ទីកន្លែង ប្រកបដោយ ចីរភាព ស្ថិរភាព គុណភាព និងមានថ្លៃកាន់តែទាប ទូទាំងប្រទេសនៅពេលខាងមុខដ៏ខ្លីនេះ។
លោកបញ្ជាក់ថា គោលដៅរបស់កម្ពុជា គឺជម្រុញការវិនិយោគបន្ថែមទៀត ដើម្បីឱ្យរាជធានី\ខេត្តទាំង២៥ មានអនុស្ថានីយ៍ ផ្តល់ប្រភពនៅក្នុងខេត្តផ្ទាល់នៅឆ្នាំ២០២០។ ខណៈដែលបច្ចុប្បន្ននេះ អគ្គិសនីកម្ពុជាកំពុងតែមមាញឹកអនុវត្តគម្រោងពង្រីក “បណ្តាញជាតិ” ដើម្បីបង្កើតឱ្យមានអនុស្ថានីយ៍ផ្ទាល់ នៅខេត្តដែលនៅសេសសល់ទាំង៦។
លោក បញ្ជាក់ថា ការផ្តល់សេវាកម្មចែកចាយ អគ្គិសនីគឺពឹងផ្អែកទៅលើការវិនិយោគ សាងសង់បណ្តាញចែកចាយ ។ គោលដៅអគ្គសនីភាវូបនីយកម្មរបស់កម្ពុជា គឺធ្វើយ៉ាងណាឱ្យគ្រប់ភូមិ អាចទទួលបានសេវាចែកចាយ អគ្គិសនីនៅឆ្នាំ២០២០។
យ៉ាងណា លោកបញ្ជាក់ថា សន្ទុះនៃការផ្តល់ថាមពលអគ្គិសនីនេះ បានដើរលឿនជាងការប៉ាន់ប្រមាណរបស់ធនាគាពិភពលោក ដែលបានធ្វើការសិក្សាថា រហូតដល់ឆ្នាំ២០៣០ ទើបលំនៅដ្ឋាន ៧០% អាចមានអគ្គិសនប្រើប្រាស់ទូទាំងប្រទេស។
លោក ស៊ុយ សែម រដ្ឋមន្ត្រីក្រសួងរ៉ែ និង ថាមពល បានមានប្រសាសន៍ថា ដល់ចុងឆ្នាំ២០២០ ភូមិទាំងអស់នៅទូទាំងប្រទេសកម្ពុជា មិនត្រឹមតែមានអគ្គិសនីប្រើប្រាស់ពីប្រភពអគ្គិសនីផ្សេងៗទេ តែក្នុងនោះយ៉ាងហោចណាស់៩៨% នៃភូមិទាំងអស់ នឹងមានអគ្គិសនីប្រើប្រាស់ចេញពីប្រភពអគ្គិសនីរបស់បណ្តាញជាតិ ដែលមានតម្លៃសមរម្យ មានការអនុគ្រោះថ្លៃ មានស្ថិរភាព និងមានគុណភាពទៀតផង។
ជាមួយគ្នានោះ ឯកឧត្តម រដ្ឋមន្ត្រី ស្នើឱ្យសេវាករអគ្គិសនីទាំងអស់ យកចិត្តទុកដាក់ អនុវត្តនិងគោរពឱ្យបាននូវគោលការណណែនាំ របស់រាជរដ្ឋាភិបាល ធ្វើយ៉ាងណាឱ្យបានទាន់ពេលវេលាឆ្លើយតបទៅនឹងតម្រូវការ របស់ប្រជាពលរដ្ឋ នឹងបញ្ចៀសឱ្យបាននូវបញ្ហា ដែលនាំឱ្យមានការប្តឹងតវាពីប្រជាពលរដ្ឋ ការរំលោភបំពានផ្សេងៗ ជាពិសេសបង្កើតបញ្ហាផ្ទុយពីកាណែនាំ។ ក្នុងរណីដែលក្រសួងរកឃើញថា មានទង្វើល្មើសនឹងសេចក្តីណែនាំ សេវាករទាំងនោះនឹងត្រូវប្រឈមមុខទទួលទោសទណ្ឌច្បាប់ផ្លូវច្បាប់ជាធរមាន។
លោក បញ្ជាក់ផងដែរថា គោលការណ៍របស់ក្រសួង គឺបន្តធ្វើការអភិវឌ្ឍប្រភពអគ្គិសនីដើម្បីឱ្យកម្ពុជាមានអគ្គិសនីប្រើប្រាស់គ្រប់គ្រាន់ និងជំរុញការអភិវឌ្ឍន៍ផលិតកម្ម អគ្គិសនីក្នុងស្រុកបន្ថែមទៀត ដើម្បីឱ្យកម្ពុជាអាចម្ចាស់ការខ្លួនឯកលើប្រភពអគ្គិសនី រួចប្រក្លាយការនាំចូល ពីប្រទេសជិតខាង ឱ្យទៅជាការធ្វើពាណិជ្ជកម្មដែលឈរលើគោលការចំណេញខាត ក្នុងការប្រើប្រាស់អគ្គិសនីនាំចូលនេះទៅវិញ៕
