ភ្នំពេញ៖ សាលាដំបូងរាជធានីភ្នំពេញនៅព្រឹកថ្ងៃទី២៥ខែមករាឆ្នាំ២០១៨នេះបានបើកសវនាការពាក់ព័ន្ធសំណុំរឿងរបស់លោកលឺឡាយស្រេង អតីតមន្ត្រីជាន់ខ្ពស់គណបក្សហ្វ៊ុនស៊ិនប៉ិច ប្រមាថព្រះចេស្តាព្រះមហាក្សត្រនិងបរិហាកេរ្តិ៍ជាសាធារណៈ ដែលប្តឹងដោយលោក គីតិចមេធាវីតំណាងដោយអាណត្តិរបស់សម្តេចតេជោហ៊ុនសែននាយករដ្ឋមន្ត្រីនៃព្រះរាជាណាចក្រ។ តុលាការបានសម្រេចផ្តន្ទទោសលោកលឺឡាស្រេង ឱ្យសងជំងឺចិត្ត៥០០លានរៀល និងចំនួន៨លានរៀលចូលថវិការដ្ឋ ។
លោក គី តិច មេធាវីតំណាង ដោយ អាណត្តិ របស់ ប្រមុខ រាជរដ្ឋាភិបាលកម្ពុជាឱ្យដឹងថា តុលាការបានសម្រេចផ្តន្ទាទោសឱ្យលោកលឺឡាយស្រេង សងសំណងជំងឺចិត្តដល់ដើមបណ្តឹងគឺសម្តេចតេជោ ហ៊ុន សែន ចំនួន៥០០លានរៀល និងថវិកាចំនួន៨លានរៀលចូលជាថវិការដ្ឋ។
សេចក្តីសម្រេចរបស់តុលាការនេះត្រូវបានប្រកាសជាសាធារណៈកំបាំងមុខជនជាប់ចោទតែចាត់ទុកចំពោះមុខ ព្រមទាំងសម្រេចឱ្យការផ្សព្វផ្សាយជាសាធារណៈ និងទុកសិទ្ធិឱ្យប្តឹងទៅឧទ្ធរណ៍តាមកំណត់ច្បាប់។
សូមបញ្ជាក់ថាកាលពីរសៀលថ្ងៃទី២៤ខែតុលាឆ្នាំ២0១៧កន្លងទៅនេះមេធារីតំណាងដោយអាណត្តិរបស់ប្រមុខរាជរដ្ឋាភិបាលកម្ពុជាបានដាក់ពាក្យបណ្តឹងផ្លូវការប្តឹលោកលឺឡាយស្រេងទៅអយ្យការ អម សាលាដំបូងរាជធានីភ្នំពេញហើយ ដោយស្នើ ឱ្យផ្តន្ទាទោសតាមច្បាប់ និងទាមទារសំណងជំងឺចិត្ត៥០០លានរៀលដល់ដើមបណ្តឹង។
ការដាក់ពាក្យបណ្តឹងរបស់លោកមេធាវី គី តិច ធ្វើឡើងបន្ទាប់ពីលោកលឺឡាយស្រេង អតីតមន្ត្រីជាន់ខ្ពស់គណបក្សហ្វ៊ុនស៊ិនប៉ិចជាមួលោកស្រីគីលំអងអតីតតំណាងរាស្ត្រគណបក្សហ្វ៊ុនស៊ិនប៉ិច បានសន្ទនាឆ្លើយឆ្លងគ្នាដែលក្រៅពីប្រមាថព្រះចេស្តាយ៉ាងធ្ងន់ធ្ងរលើអង្គព្រះមហាក្សត្រនិងសម្តេចក្រុមព្រះហើយនោះ ថែមទាំងនិយាយធ្វើ ឱ្យ ប៉ះពាល់ដល់កេរ្តិ៍ឈ្មោះ កិត្តិយសកិត្តិស័ព្ទយ៉ាងធ្ងន់ធ្ងរ ដល់ប្រមុខដឹកនាំជាន់ខ្ពស់រាជរដ្ឋាភិបាលកម្ពុជាផងដែរ ដែលត្រូវបានយកទៅផ្សព្វផ្សាយជាសាធារណៈយ៉ាងទូលំទូលាយ។
ពាក្យបណ្តឹងរបស់លោក គី តិចប្តឹងលោកលឺឡាយស្រេង បានសុំ ឱ្យ ព្រះរាជអាជ្ញា នៃអយ្យការសាលាដំបូងរាជធានីភ្នំពេញ
១សុំឱ្យអយ្យការនិងសាលាដំបូងរាជធានីភ្នំពេញ ធ្វើការចោទប្រកាន់ និងផ្តន្ទាទោស លើឈ្មោះលឺឡាយស្រេងតាមច្បាប់ ២ ទាមទារឱ្យឈ្មោះ លឺ ឡាយស្រេងសងសំណងជំងឺចិត្តចំនួន៥០០លានរៀលដល់ដើមបណ្តឹងរដ្ឋប្បវេណី៣សុំឱ្យ តុលាការប្រកាសផ្តន្ទាទោសបន្ថែមផ្អែកតាមមាត្រា៣១០នៃក្រមព្រហ្មទណ្ឌ។
ករណីនេះកាលពីថ្ងៃទី២៤ ខែតុលា ឆ្នាំ២០១៧ រដ្ឋមន្ត្រី ក្រសួងយុត្តិធម៌លោកអង្គវង្ស វឌ្ឍនា នេះបានស្នើ ឱ្យ ចាត់វិធានការតាមផ្លូវច្បាប់ជាបន្ទាន់ និងតឹងរ៉ឹងបំផុតចំពោះលោកលឺឡាយស្រេង ដែលបានប្រមាថយ៉ាងធ្ងន់ធ្ងរដល់ព្រះចេស្ដាអង្គព្រះមហាក្សត្រ៕
