ខេត្តព្រះសីហនុ៖ក្រសួងសេដ្ឋកិច្ច និងហិរញ្ញវត្ថុ ប្រកាសប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ២០១៧។ សេចក្ដីជូនដំណឹងស្ដីពីការប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ បានអំពាវនាវឲ្យពលរដ្ឋជាម្ចាស់យានយន្តគ្រប់ប្រភេទ ចូលបង់ពន្ធដែលអនុវត្តនៅថ្ងៃទី១៥ មិថុនា រហូតដល់ថ្ងៃ៣០ ខែវិច្ឆិកា។
ក្រសួងសេដ្ឋកិច្ច បញ្ជាក់ថា ចាប់ពីថ្ងៃទី១ ខែមករា ឆ្នាំ២០១៨ អង្គភាពពន្ធដារនឹងចុះត្រួតពិនិត្យ និងផាកពិន័យចំពោះមធ្យោបាយដឹកជញ្ជូន និងយានជំនិះទាំងឡាយណាដែលមិនទាន់បានប្រកាសបង់ពន្ធក្នុងឆ្នាំកន្លងទៅ នឹងត្រូវបង់ពន្ធ និងបង់ប្រាក់ពិន័យ ១០០% នៃប្រាក់ពន្ធដែលត្រូវបង់។
ដោយឡែក សំរាប់ខេត្តព្រះសីហនុ នាព្រឹកថ្ងៃទី៦ ខែកុម្ភះ ឆ្នាំ២០១៨ នេះ មន្ទីរពន្ធដារខេត្តព្រះសីហនុ មន្ត្រីជំនាញពន្ធដារ សហការជាមួយកម្លាំងចម្រុះបានចុំត្រួតពិនិត្យផ្លូវលើរថយន្តគ្រប់ប្រភេទ ដែលកំពុងធ្វើចរាចរណ៍នៅក្នុងខេត្តនេះ។
លោក សុខ ចំណាន មន្ត្រីពន្ធដារ ដែលកំពុងចុះអនុវត្តត្រួតពិនិត្យពន្ធបានអោយដឹងថា៖ការចុះអនុវត្តត្រួតពិនិត្យលើពន្ធផ្លូវនេះគឺមាន រយៈពេល៣ខែ។
នៅថ្ងៃនេះផងដែរ គឺជាថ្ងៃចុះអនុវត្តពិនិត្យពន្ធផ្លូវលើកដំបូង លោក ឃើញថា រថយន្តដែលមិនទាន់បង់ពន្ធផ្លូវ គឺមានច្រើន ជាពិសេសរថយន្តដែលជនជាតិចិនកំពុងប្រើប្រាស់តែម្តង។
លោក សុខ ចំណាន សូមធ្វើការអំពាវនាវ សូមអោយបងប្អូនដែលមានរថយន្តហើយតែមិនទាន់បានបង់ពន្ធផ្លូវប្រចាំឆ្នាំ ២០១៧ នោះសូមចូលរួមបង់ពន្ធអោយបានគ្រប់គ្នា។
ចំណែកប្អូនប្រុស ឈ្មោះ រី ណា ដែលជាប្រជាពលរដ្ឋរស់នៅក្រុងព្រះសីហនុវិញបានអោយដឹងថា៖ការបង់ពន្ធផ្លូវជូនរដ្ឋយ៉ាងដូច្នេះ គឺល្អណាស់ ព្រោះរដ្ឋអាចប្រមូល ថវិកា នេះយកទៅកសាងផ្លូវបន្ថែមទៀត។
មិនខុសគ្នានោះទេ បង ប្រុស ឈ្មោះ មុំ សុម៉ាលី អ្នកបើកបរ រថយន្ត អោយក្រុមហ៊ុន ឯកជន បានអោយដឹងថា៖ការបំពេញកាតព្វកិច្ចបង់ពន្ធផ្លូវ ជូនរដ្ឋនេះ ល្អណាស់ ព្រោះបើសិនជាមិនបានបង់ពន្ធនោះទេ រដ្ឋនឹងបាត់បង់ប្រាក់ចំណូល ហើយការបង់ពន្ធផ្លូវនេះ រដ្ឋអាចយក ថវិកាទាំងនេះទៅអភិវឌ្ឍប្រទេសជាតិអោយមានការ រីកចំរើនបន្ថែមទៀត៕
