ភ្នំពេញ ៖ តាមរបាយការណ៍របស់ក្រសួងសាធារណការ និងដឹកជញ្ជូន បានឲ្យដឹង ថា រថយន្ដធុនធំជាង១ម៉ឺនគ្រឿង ត្រូវបានអាជ្ញាធរ និងសមត្ថកិច្ចទូទាំងប្រទេសត្រួតពិនិត្យ ក្នុងនោះមានរថយន្ដជិត៣០០គ្រឿង ដែលខុសកែច្នៃបច្ចេកទេស ត្រូវកាត់ចោលតែម្តង
របាយការណ៍របស់ក្រសួងសាធារណការ និងដឹកជញ្ជូន ដែលផ្សព្វផ្សាយនៅរសៀលថ្ងៃទី១៤ ខែកុម្ភៈ នេះ បានឲ្យដឹង ថា ដោយគិតត្រឹមថ្ងៃទី១២ ខែកុម្ភៈ មានរថយន្ដជាង១ម៉ឺនគ្រឿង ត្រូវបានចាប់ត្រួតពិនិត្យ ដោយក្នុងនោះ២៨៧គ្រឿងបានកាត់ទ្រុង,១៦២គ្រឿងត្រូវបានរុះរើ និងដោះទ្រុងដែលរៀបចំតខុសបច្ចេកទេស, និង៣២១គ្រឿងត្រូវបានចាប់ទុករៀបចំកាត់ជាបន្ដបន្ទាប់។
យ៉ាងណាមិញ សម្រាប់របាយការណ៍លេខខាងលើនេះ មិនទាន់មានចំនួនពេញលេញនៅឡើយទេ ដោយហេតុថា អាជ្ញាធរ និងសមត្ថកិច្ចនៅទូទាំងប្រទេសបាន និងកំពុងបើកប្រតិបត្តិនេះជាបន្ដបន្ទាប់។
សូមជម្រាបថា បន្ទាប់ពីឃើញហានិភ័យ នៃគ្រោះថ្នាក់ចរាចរលើដងវិថី និងការបំផ្លាញផ្លូវមកពីការដឹកលើសទម្ងន់ របស់រថយន្តតទ្រុង ខុសលក្ខណៈបច្ចេកទេសនោះ សម្តេចតេជោហ៊ុន សែន កាលពីថ្ងៃទី៩ ខែកុម្ភៈ ឆ្នាំ២០១៨កន្លងទៅនេះ បានដាក់ចេញនូវបទបញ្ជាជាថ្មី ឲ្យចាត់វិធានការដ៏តឹងរឹងបំផុត ចំពោះរថយន្តតទ្រុងខុសលក្ខណៈបច្ចេកទេសទាំងនេះ។ ពោលចាប់ពីត្រឹមម៉ោង ១២៖០០នាទីយប់ថ្ងៃទី៩ ខែកុម្ភៈ គ្រប់រថយន្តតទ្រុងមិនអាចធ្វើចរាចរលើដងវិថីបានឡើយ ហើយបើធ្វើចរាចរកន្លែងណា ត្រូវចាប់កាត់កន្លែងនោះ។
ក្រោយបទបញ្ជានេះ មន្ត្រីគ្រប់លំដាប់ថ្នាក់នៅតាមរាជធានី-ខេត្ត បានធ្វើសកម្មភាពយ៉ាងសស្រាក់សស្រាំចាប់កាត់រថយន្តតទ្រុងខុសបច្ចេកទេសទាំងនោះ ហើយក៏មានម្ចាស់រថយន្តខ្លះ បានយករថយន្តទៅកាន់ទ្រុងដោយខ្លួនឯងផងដែរ។ សម្តេចតេជោ បានបញ្ជាក់ថា ប្រតិបត្តិការកាត់រថយន្តតទ្រុងខុសបច្ចេកទេសនេះ មិនមានការដកថយនោះឡើយ ហើយទឹកដីណា គឺថ្នាក់ដឹកនាំនៃខេត្តនោះជាអ្នកចាត់ការមិនចាំបាច់ក្រសួងសាធារណការនោះទេ។
សម្តេចតេជោ ហ៊ុន សែន ក៏បានឲ្យពិនិត្យមើលយានដ្ឋានទាំងឡាយណា ដែលនៅបន្តកែច្នៃរថយន្ត ឬ តទ្រុងរថយន្តខុសច្បាប់នេះផងដែរ បើមិនគោរពតាមច្បាប់ទេ គឺបិទចោលតែម្តងទៅ៕
