ព្រៃវែង ៖ ពលរដ្ឋប្រមាណជាង២០០គ្រួសារ បានមកជួបជុំគ្នានៅចំណុច “ភោជនីយដ្ឋានបឹងឈូក” នៅជាប់បណ្តោយផ្លូវជាតិលេខ៨ ស្ថិតក្នុងភូមិកំពង់ពពិល ឃុំកំពង់ពពិល ស្រុកពារាំង ខេត្តព្រៃវែង កាលពីព្រឹកថ្ងៃទី២១ ខែមេសា ឆ្នាំ២០១៨ ដែលទីនេះ ជាសកម្មភាពចល័តទីតាំងរបស់ឈ្មួញ ដែលតម្រូវឲ្យពលរដ្ឋនៅជុំវិញបឹងខ្យង ឈរឈ្មោះលក់ដីបឹងសាធារណៈរបស់រដ្ឋដោយឲ្យប្រាក់ឈ្នួលក្នុងម្នាក់តម្លៃ១០០ដុល្លារ។
ការជួបជុំរបស់ពលរដ្ឋនៅក្នុងទីតាំងនៃ”ភោជនីយដ្ឋាន”ខាងលើគឺពួកគាត់សុទ្ធតែមកពីភូមិព្រែកថ្មី ឃុំជ័យធំ ស្រុកខ្សាច់កណ្ដាល ខេត្តកណ្ដាល ក្នុងគោលបំណងមកជួបឈ្មួញកណ្តាល តាមការណាត់ ដើម្បីទទួលយកលុយលក់ដីបឹង”ខ្យង”ប្រមាណជា១០០ហិកតា នៅក្រោយភូមិរបស់ពួកគាត់នោះ ឲ្យទទួលបានលុយម្នាក់១០០ដុល្លារដូចគេដូចឯងដែរ។
ពលរដ្ឋអះអាងថា ដីបឹងខ្យង នេះកាលពីមុនរហូតមកដល់បច្ចុប្បន្ន គឺជាដីបឹងសាធារណៈរបស់រដ្ឋ ដែលពលរដ្ឋនៅទីនោះប្រមាណជា៨០ភាគរយ បានអាស្រ័យផលពីដីបឹងមួយនេះ។ ប៉ុន្តែពួកគាត់លើកឡើងថា បើគេលក់ដីបឹងនោះក៍លក់ទៅចុះហេតុអ្វីបានជាឈ្មួញតម្រូវឲ្យមានឈ្មោះតែ២២០នាក់? ខណៈអ្នកភូមិរបស់ពួកគាត់មានរហូតដល់ជាង៣០០គ្រួសារស្មើនឹងរាប់ពាន់អ្នកឯណោះ។
ក្នុងនោះគេកត់ឈ្មោះរាប់បញ្ចូលតែបក្ខពួកគ្នាគេដោយគ្រួសារខ្លះមានគ្នា៦នាក់ទទួលបានលុយម្នាក់១០០ដុល្លារទាំងអស់។ រីឯគ្រួសារខ្លះ សូម្បីតែម្នាក់ក៍គ្មានឈ្មោះផង និយាយរួមអ្នកបានលុយគេនៅស្ងៀម ចំណែកអ្នកមិនទាន់បានលុយគឺនៅតែអត់ និងមានប្រតិកម្មទើបបែកធ្លាយថា ឈ្មួញកណ្តាលយកពលរដ្ឋឲ្យឈរឈ្មោះលក់ដីបឹងរបស់រដ្ឋឲ្យទៅពួកខ្លួន “ឈ្មួញកណ្តាល” ជាថ្នូរឲ្យលុយម្នាក់១០០ដុល្លារ និងចុះឈ្មោះថតរូប គូបពី អត្តសញ្ញាណបណ្ណ័ ដើម្បីយកទៅក្លែងបន្លំឯកសារធ្វើប្លង់ព័ទយកដីបឹងខ្យង រាប់រយហិកតាទុកលក់ទៅឲ្យក្រុមហ៊ុន ឫអ្នកវិនិយាគបន្តចំណេញរាប់ម៉ឺនលានដុល្លារដោយងាយ។
បើតាមបងស្រីម្នាក់ បានបញ្ជាក់ថា អ្នកដែលទទួលលុយពីឈ្មួញមានចំនួនតិចទេ រីឯអ្នកមានឈ្មោះហើយមិនទាន់បានលុយក៍មានច្រើនដែរ ចំណែកអ្នកដែលមិនទាន់មានឈ្មោះសោះ នៅមានក៍រិតតែច្រើនជាងនឹងទៅទៀត ហេតុនេះទើបអ្នកដែលមិនទាន់មានឈ្មោះក្នុងបញ្ជីរបស់ឈ្មួញ និងមិនទាន់បានលុយ បាននាំគ្នាកាន់អត្តសញ្ញាណដើម្បីមកយកលុយ និងចុះឈ្មោះយកលុយដែរ តែទីបំផុតបានត្រឹមតែសោកការ លុយក៍មិនបាន ពេលវេលាក៍ខាត ព្រោះឈ្មួញបានគេចខ្លួនបាត់អស់ ដោយមិននៅដោះស្រាយដូចការណាត់នោះឡើយ។
ប្រភពបានឲ្យដឹងថា ការជួបជុំរបស់ពលរដ្ឋបែបនេះ មិនមែនជាលើកទី១ទេ គឺច្រើនលើកហើយ នៅស្រុកខ្សាច់កណ្ដាល ប៉ុន្តែត្រូវបានអាជ្ញាធររារាំងមិនឲ្យមានសកម្មភាពបែបនេះ ទើបឈ្មួញបង្វែរមកជួបជុំគ្នានៅឯស្រុកពារាំង ខេត្តព្រៃវែងវិញ។
យោងតាមរបាយការណ៍របស់សាលាឃុំជ័យធំ នៅពេលថ្មីៗនេះ បានឲ្យដឹងថា មេខ្យល់ដែលទទួលយកលុយពីក្រុមហ៊ុនទុច្ចរិត ទៅចែកប្រជាពលរដ្ឋដើម្បីផ្តិតមេដៃលក់បឹងនេះ ទី១មានឈ្មោះ ម៉ៅ សឿន,ទី២ឈ្មោះ គឹម ឡុក និងទី៣ឈ្មោះ យឿន រ៉ា ដែលមានទីលំនៅដ្ឋានក្នុងឃុំនេះ។
ទោះជាយ៉ាងណា កាលពីថ្ងៃទី១៩ខែមេសា លោកបណ្ឌិត ម៉ៅ ភិរុណ អភិបាលខេត្តកណ្ដាល បានដាក់បទបញ្ជាឲ្យអាជ្ញាធរមូលដ្ឋាន ក្នុងស្រុកខ្សាច់កណ្ដាល ចាត់វិធានការទប់ស្កាត់សកម្មភាពប្រើល្បិចយកបឹងធម្មជាតិរបស់រដ្ឋដោយខុសច្បាប់មកធ្វើជាកម្មសិទ្ធិឯកជន ដោយព្រមានចាត់វិធានការផ្លូវច្បាប់ គឺចាប់ខ្លួនមេខ្យល់ និងឈ្មួញទុច្ចរិត ដាក់ពន្ធនាគារទៀតផង។
គួរបញ្ជាក់ថា ប្រជាពលរដ្ឋនៅក្នុងភូមិព្រែកថ្មី ប្រមាណ៥០ទៅ៦០នាក់ប៉ុណ្ណោះ ដែលបានទទួលលុយពីឈ្មួញម្នាក់១០០ដុល្លារ សម្រាប់ការឈរឈ្មោះលក់ដីបឹងខ្យង ដោយពុំមានការទទួលស្គាល់ ឬចុះហត្ថលេខាពីអាជ្ញាធរឡើយ នេះអាចជាការចាញ់បោកក្នុងការទិញលក់រវាងឈ្មួញ និងពលរដ្ឋ លើដីបឹងទាំងមូលដោយឲ្យតម្លៃក្នុងម្នាក់ៗតែ១០០ដុល្លារប៉ុណ្ណោះ៕
