ភ្នំពេញ ៖ ផ្លូវណតប្រ៊ីត(ផ្លូវទ្រុងមាន់) កាលពី៣ឆ្នាំមុន លំបាកធ្វើដំណើរខ្លាំង ដោយសារទឹកលិច មានជ្រម្រៅជ្រៅ។ ប៉ុន្តែឥឡូវនេះ ផ្លូវនោះត្រូវបានក្រុមហ៊ុនសៀងហៃប្រទេសចិន ជួយសាងសង់ជាផ្លូវបេតុង ជិតរួចរាល់១០០%ហើយ។
ផ្លូវណតប្រ៊ីត ប្រវែងប្រមាណ៣គីឡូម៉ែត្រ ទទឹង២៣ម៉ែត្រ កំពុងពន្លឿនការសាងសង់ ជិតរួចរាល់១០០%ហើយ ចាប់ពីស្តុបផ្សារដីហុយ ទៅដល់ស្តុបផ្លូវវេងស្រង។
ចំណែកផ្លូវផ្នែកខាងកើត ក្រុមហ៊ុនបានចាក់បេតុងរួចរាល់១០០%។ សួនចំកណ្តាលផ្លូវក្រុមហ៊ុនកំពុងរៀបជាសួនច្បារបណ្តើរៗ។ រីឯចំណែកផ្លូវផ្នែកខាងលិច នៅខ្វះប្រមាណ១០០ម៉ែត្រទៀតចាក់បេតុងរួចដែរ។
បុគ្គលិកខ្មែរកំពុងបាញ់ទឹកស្រោច ផ្លូវណតប្រ៊ីតក្រោយចាប់បេតុងរួច លោក យីន ឲ្យដឹងថាការស្រោចទឹកតាមផ្លូវ គឺ១ថ្ងៃបាញ់ទឹកស្រោច៣ដង សម្រាប់បង្ការដីហុយ និងការពារកុំឲ្យ បេតុងប្រេះខូចនៅពេលអាកាសធាតុក្តៅខ្លាំង។ លោកបន្តថា ផ្លូវណតប្រ៊ីតនេះបំបែកដោយ ទ្រូងផ្លូវ ជាពីរចំណែក។ ការចាក់បេតុង មិនអាចចាក់ទាំងសងខាងផ្លូវ ក្នុងពេលជាមួយគ្នា បានទេ។ ទើបក្រុមហ៊ុន ចាក់បេតុងតែផ្នែកខាងកើតផ្លូវមុន។ គាត់ស្រោចផ្លូវចាក់បេតុងនេះ ឲ្យឆ្អែតទឹកសិន ទើបរៀបចំចាក់បេតុងចំណែកផ្លូវខាងលិចទៀត បង្ការកុំឲ្យស្ទះចរាចរណ៍។បង្គោលភ្លើងឈរនៅកណ្តាលផ្លូវណតប្រ៊ីត មិនទាន់ដកចេញទេ។
បើតាមការអះអាងរបស់អ្នកនាំពាក្យ ក្រសួងសាធារណៈការ និងដឹកជញ្ជូន ឯកឧត្តម វ៉ា សឹមសុរិយា មានប្រសាសន៍នៅថ្ងៃទី០៤ ខែមិថុនានេះថា តាមគោលការ បង្គោលភ្លើងឈរនៅកណ្តាលផ្លូវ ណតប្រ៊ីត នឹងដកចេញនៅក្នុងខែមិថុនា ក្រោយពេលក្រុមបច្ចេកទេសអគ្គិសនី រៀបចំប្រអប់ក្រោមដី រៀបចំខ្សែរត់តាមផ្លូវនោះរួចរាល់។
ផ្លូវណតប្រ៊ីត កំពុងការកសាងថ្មី ដោយក្រុមហ៊ុនចិនសៀងហៃ ចាប់ពីខណ្ឌសែនសុខ ឆ្ពោះទៅកាន់ផ្លូវជាតិលេខ២ ជាផ្លូវក្រវាត់ក្រុងទី២ ដែលគ្រោងនឹងបញ្ចប់ នៅឆ្នាំ ២០១៩។
ផ្លូវណតប្រ៊ីត ជាចំណែកមួយនៃផ្លូវក្រវាត់រាជធានីភ្នំពេញ ទៅកាន់ផ្លូវបំបែកចំការដូងបំបែកផ្លូវ៦០ម៉ែត្រ ឆ្ពោះទៅផ្លូវជាតិលេខ២ ក្នុងឃុំបាគូ ស្រុកកណ្តាលស្ទឹង ខេត្តកណ្តាល៕
