ខេត្តតាកែវ ៖ នៅព្រឹកថ្ងៃទី២០ ខែមិថុនា ឆ្នាំ២០១៨នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នឹងអញ្ជើញចុះជួបសំណេះសំណាលជាមួយកម្មករ កម្មការិនីសរុប ១៧,៧៦៧នាក់ មកពីរោងចក្រ សហគ្រាស ចំនួន១៣ នៅក្នុងខេត្តតាកែវ។
សូមជម្រាបថា រោងចក្រ សហគ្រាស ដែលអនុញ្ញាតឲ្យកម្មករ កម្មការិនីជួបសំណេះសំណាលជាមួយសម្តេចតេជោ ហ៊ុន សែន នាព្រឹកនេះគឺ មកពីក្រុងដូនកែវចំនួន៤ ស្រុកសំរោងចំនួន៤ ស្រុកព្រៃកប្បាសចំនួន២ ស្រុកត្រាំកក់ចំនួន២ និងស្រុកទ្រាំងចំនួន១ ដែលមានអ្នកវិនិយោគមកពីប្រទេសចិនចំនួន១២ និងខ្មែរចំនួន១។
គួររំលឹកថា ពិធីសំណេះសំណាលនិងត្រូវធ្វើឡើងនៅក្រុងដូនកែវ ខេត្តតាកែវ ។ ជំនួបនៅថ្ងៃទី២០ ខែមិថុនានេះ គឺជាជំនួបលើកទី ៤៥ ហើយ គិតចាប់តាំងពីថ្ងៃទី២០ខែសីហា ឆ្នាំ២០១៧មក ។ ក្នុងជំនួប ៤៥ លើកនេះមានកម្មករ និយោជិត សរុបជាង ៥៨ ម៉ឺននាក់ ។
លោក អិត សំហេង រដ្ឋមន្ត្រីក្រសួងការពារនិង បណ្តុះបណ្តាលវិជ្ជាជីវៈ បានឲ្យដឹងថា រោងចក្រ សហគ្រាសទាំង ១៣ គឺមកពីក្រុងដូនកែវចំនួន ៤ ស្រុកសំរោងចំនួន ៤ ស្រុកព្រៃកប្បាសចំនួន ២ ស្រុកត្រាំកក់ចំនួន២ និង ស្រុកទ្រាំងចំនួន ១ដែលមាន អ្នកវិនិយោគមកពីប្រទេសចិនចំនួន ១២ និង ខ្មែរចំនួន ១ ។
រោងចក្រ សហគ្រាសទាំង១៣នេះមានរោង ចក្រកាត់ដេរសម្លៀកបំពាក់ចំនួន ១១ និង ផលិតស្បែកជើងចំនួន២ ។ ផលិតផលចេញពីរោងចក្រ សហគ្រាសទាំងនេះត្រូវបាននាំ ចេញទៅកាន់ទីផ្សារអន្តរជាតិ និង ផ្គត់ផ្គង់ទីផ្សារក្នុងប្រទេស។
បច្ចុប្បន្នខេត្តតាកែវមានសហគ្រាស គ្រឹះស្ថានចំនួន ១៤៤ មានកម្មករនិយោជិត ៤៦.៩៩០ នាក់ ។ក្នុងនោះរោងចក្រកាត់ដេរ សម្លៀកបំពាក់និង ផលិតស្បែកជើង មាន ចំនួន ៣៧ មានកម្មករនិយោចិតចំនួន ៣៨.១៥៨ នាក់ ដែលមានប្រាក់ឈ្នួលសរុបប្រមាណជិត ៧៨ លានដុល្លារក្នុងមួយឆ្នាំ៕
