ភ្នំពេញ៖ផ្ទៃដីទំហំប្រមាណជាង ១០០ហិកតា ក្នុងតំបន់បឹងកក់រាជធានីភ្នំពេញ ត្រូវបានលោក ឡាវ ម៉េងឃីន ដែលជាម្ចាស់ក្រុមហ៊ុន ស៊ូកាគូអ៊ីន បូមខ្សាច់ចាក់លុបបំពេញ ដើម្បីវិនិយោគអភិវឌ្ឍន៍ជាមជ្ឈមណ្ឌលពាណិជ្ជកម្ម ផ្សារទំនើប អាគារស្នាក់នៅ និងមណ្ឌលកម្សាន្តនានា។
តំណាងក្រុមហ៊ុនលោក ឡាវ ម៉េងឃីន បានឲ្យដឹងថា ការអភិវឌ្ឍន៍នៅលើតំបន់បឹងកក់នេះ ពេល នេះ ក្រុមហ៊ុនចាប់ផ្តើមដំណើរការសាងសង់អាគារ និងប្រព័ន្ធហេដ្ឋារចនាសម្ព័ន្ធនានា ដែលគម្រោងទាំងអស់នឹងបញ្ចប់ជាជំហានៗ និងតាមផ្នែកនីមួយៗ ក្នុងរយៈពេលប៉ុន្មានឆ្នាំខាងមុខនេះ មានតម្លៃប្រមាណ ៣០០ លានដុល្លារ អាមេរិក។
ក្រៅពីបណ្តាញផ្លូវពីរខ្សែ ដែលមានទ្រូងផ្លូវជាង ២០ម៉ែត្រ កំពុងដាក់ឲ្យអ្នករាជធានីភ្នំពេញ ធ្វើដំណើរឆ្លងកាត់បណ្តោះអសន្ន ពេលនេះក្រុមហ៊ុន កំពុងដំណើរការរៀបចំប្រព័ន្ធលូរំដោះទឺក ព្រមទាំងបំពាក់ប្រព័ន្ធអគ្គិសនីបំភ្លឺផ្លូវជួយសម្រួលការធ្វើការនៅពេលយប់។ ប្រព័ន្ធផ្លូវ និងការបំពាក់ប្រព័ន្ធអគ្គិសនី បំភ្លឺផ្លូវនេះ គ្រោងនឹងបញ្ចប់នៅចុងឆ្នាំ២០១៥។
គួររំលឹកថា ការអភិវឌ្ឍតំបន់បឹងកក់នេះ គឺផ្តើមឡើងដោយសម្រែកតវ៉ានានា ពីប្រជាពលរដ្ឋរស់នៅក្នុងតំបន់បឺងកក់់ រហូតត្រូវបានចាប់ក្រុមអ្នកតវ៉ាទាំងនោះដាក់ពន្ធនាគារទៀតផង។
គួរបញ្ជាក់ថា កាលពីព្រឹកថ្ងៃទី២២ ខែមេសា ឆ្នាំ២០១៥ ស្ត្រីបឹងកក់ ដែលទើបចេញពីគុក បាននាំគ្នាដើរដាក់ញត្តិ នៅក្រសួងមហាផ្ទៃ និងរដ្ឋសភា ក្នុងបំណងដើម្បីឲ្យអាជ្ញាធរជួយជំរុញការដោះស្រាយដីធ្លីជូនពលរដ្ឋនៅសេសសល់ចុងក្រោយ ចំនួន ១៣គ្រួសារបន្ថែមទៀត ៕
