ភ្នំពេញ៖ ករណីយកលុយរាប់សិបម៉ឺនដុល្លារអាមេរិក មកសូកប៉ាន់ ដែលផ្សព្វផ្សាយតាមរយៈខ្សែវីដេអូមួយ ប៉ុន្តែ ថោង សារ៉ាត់ បានបដិសេធគ្រប់ចំណុចហើយថា មិនបានសូកប៉ាន់អ្នកណាទេ ពាក់ព័ន្ធករណីបាញ់សម្លាប់លោកឧកញ៉ា អ៊ឹង ម៉េងជឺ និងដោះលែង ឪពុកម្តាយ ចេញពីពន្ធនាគារ។
ថោង សារ៉ាត់ បដិសេធនេះ បានធ្វើឡើង ខណៈអង្គភាពប្រឆាំងអំពើពុករលួយ (អ.ប.ព)បានសួរនាំ។លោក ឱម យ៉ិនទៀង ទេសរដ្ឋមន្ត្រី ប្រធាន អ.ប.ព ថ្លែងប្រាប់អ្នកសារព័ត៌មាន កាលពីព្រឹកថ្ងៃទី៣០ ខែមេសា ឆ្នាំ២០១៥ ថា ក្រោយពេលមានករណីបាញ់សម្លាប់លោកឧកញ៉ា អ៊ឹង ម៉េងជឺ លោកឧកញ៉ា ថោង សារ៉ាត់ បានចេញខ្សែវីដេអូមួយស្រែកថា សូកប៉ាន់អស់រាប់សិបម៉ឺនដុល្លារអាមេរិក។
លោក ឱម យ៉ិនទៀង បានបញ្ជាក់ថា “នេះជាជួងមួយ ដាស់ អ.ប.ព ឲ្យចាប់ផ្តើមធ្វើការហើយ ខ្ញុំ និងតុលាការ នគរបាល ក៏ចាប់ផ្តើមសង្ស័យដែរ។ ខ្ញុំថា ខ្ញុំចាប់ផ្តើមធ្វើការដោយសម្ងាត់ ចាប់តាំងពីពេល នោះមក។ អីចឹង នៅពេលដែល ថោង សារ៉ាត់ មកវិញ យើងខ្ញុំមានភារកិច្ចត្រូវសួរ ដើម្បីសួរបំភ្លឺគាត់ យកភស្តុតាងពីគាត់ ថាគាត់ចាយអស់ប៉ុន្មាន អ្នកណាជាអ្នកយកលុយទៅឲ្យគេ អ្នកណាជាអ្នកទទួល។ ប៉ុន្តែការសួរប៉ុន្មានម៉ោង ៣-៤ ម៉ោង ទៅលើ ថោង សារ៉ាត់ នោះ គឺគាត់បានធ្វើការបដិសេធថា មិនបានឲ្យលុយទៅអ្នកណាទេ”។
លោក ឱម យ៉ិនទៀង បានលើកឡើងថា “យើងខ្ញុំត្រូវរកភស្តុងតាង តើភស្តុតាង គាត់មានឲ្យ ឬភស្តុតាងគាត់អត់មានឲ្យមែន ឬយ៉ាងម៉េចទៀត នេះជាភារកិច្ចរកភស្តុតាងបន្តទៀត។ មិនសាមញ្ញទេ រឿងគេកើតហើយក៏ពិបាក គេមិនទាន់ដឹងខ្លួនក៏ពិបាក ចុះទំរាំគេដឹងខ្លួនទៀត ប៉ុន្តែយើងនៅតែបន្ត មិនមែនថោង សារ៉ាត់ ជាមនុស្សទី១ទេ ថោង សារ៉ាត់ ជាមនុស្សទី៩ ដែល អ.ប.ព បានស្តាប់និងសួរនាំ ហើយយើងនៅត្រូវការអ្នកសួរនាំប៉ុន្មាននាក់ថែមទៀត ដើម្បីលូករកភស្តុតាង ដើម្បីលូករកឯកសារ ដោយមិនបំពានលើច្បាប់។ ចាប់តាំងពីដំណើរការមកដល់ពេលនេះ ឯកសារមានចង់កន្លះទូរហើយ ហើយឯកសារខ្លះអាចប្រើប្រាស់បាន និងឯកសារខ្លះមិនអាចប្រើប្រាស់បាន”។
លោកបានបន្តថា “នៅពេលដែលស្តាប់ចម្លើយរបស់ ថោង សារ៉ាត់ គឺគាត់ បានប្រកែកគ្រប់ចំណុច នៃការសូកប៉ាន់ ហើយគាត់ថា មិនបានសូកប៉ាន់អ្នកណាទេ”។
សូមបញ្ជាក់ថា លោកឧកញ៉ា ថោង សារ៉ាត់ ត្រូវបានកម្លាំងសមត្ថកិច្ចចាប់ខ្លួន កាលពីថ្ងៃទី១៦ ខែមេសា ឆ្នាំ២០១៥ នៅច្រកព្រំដែនកម្ពុជា-វៀតណាម (បាវិត) ខេត្តស្វាយរៀង។
លោក ថោង សារ៉ាត់ ត្រូវបានតុលាការចោទប្រកាន់ពីបទ “ផ្តើមគំនិតក្នុងអំពើឃាតកម្មគិតទុកជាមុន និងរក្សាខុសច្បាប់” ក្នុងសំណុំរឿងបាញ់សម្លាប់លោកឧកញ៉ា អ៊ឹង ម៉េងជឺ ប្រព្រឹត្តកាលវេលាម៉ោង ៧ និង ១៨នាទី យប់ថ្ងៃទី២២ ខែវិច្ឆិកា ឆ្នាំ២០១៤ ខណៈ ពេល លោកឧកញ៉ា អ៊ឹង ម៉េងជឺ ចុះពីរថយន្តឡិចស៊ីស ៥៧០ ដើម្បីទៅទិញផ្លែឈើ នៅមុខហាងលក់ផ្លែឈើ ឡោ តិចសេង ស្ថិតនៅផ្លូវលេខ ២៧៤ សង្កាត់ទួលស្វាយព្រៃទី២ ខណ្ឌចំការមន ហើយ ថោង សារ៉ាត់ ត្រូវបាន យកទៅឃុំឃាំងនៅពន្ធនាគារព្រៃស៕
