ភ្នំពេញ ៖លោកឌី រ័ត្នខេមរុណ អភិបាលរងខណ្ឌមានជ័យ ថ្លែងថា មន្ត្រីនគរបាលគឺជាកម្លាំងស្នូលដ៏រឹងមាំ ដែលមានកាតព្វកិច្ចដើរតួនាទីយ៉ាងសំខាន់ក្នុងការថែរក្សាការពារ សន្តិសុខសុវត្ថិភាពជូនបងប្អូនប្រជាពលរដ្ឋក្នុងមូលដ្ឋាន ឱ្យរស់នៅប្រកបដោយភាពសុខុដុមរមនា ។
លោកឌី រ័ត្នខេមរុណ ថ្លែងបែបនេះ នៅព្រឹកថ្ងៃទី៦ ខែកញ្ញា ក្នុងពិធីចែកអំណោយជាមួកសុវត្ថិភាពរបស់កងកម្លាំង ក៏ដូចជាថវិការមួយចំនួនចែកជូនដល់ដល់មន្ត្រីនគរបាលប៉ុស្តិ៍ស្ទឹងមានជ័យទី២ ចំណុះអធិការដ្ឋាននគរបាលខណ្ឌមានជ័យ ដើម្បីយកទៅប្រើប្រាស់ នៅថ្ងៃមុខបន្ត ក្នុងទិសដៅសំដៅបម្រើប្រជាជននៅក្នុងមូលដ្ឋានរបស់ខ្លួន ។
លោកអភិបាលរង ឌី រ័ត្នខេមរុណ លើកឡើងថា មន្ត្រីនគរបាល គឺជាកម្លាំងស្នូលដ៏រឹងមាំ ដែលកន្លងមកពួកគេបានលះបង់ទាំងកម្លាំងកាយនិងកម្លាំងចិត្ត ក៏ជាពេលវេលាជាច្រើន ក្នុងការខិតខំប្រឹងប្រែងខ្នះខ្នែងរក្សានូវសុខសន្តិភាពជូនបងប្អូនពលរដ្ឋ ។
លើសពីនេះ នគរបាលក៏បានដើរតួយ៉ាងសំខាន់ ក្នុងការបង្ការបង្ក្រាបបទល្មើសផ្សេងៗ ដូចជាអំពើលួច ឆក់ ប្លន់ និងសកម្មភាពអសន្តិសុខមួយចំនួនទៀតជាដើម ។
លោកអភិបាលរង បញ្ជាក់ថា ការនាំយកសម្ភារៈជាមួក ចែកជូនបងប្អូនមន្ត្រីនគរបាលនៅពេលនេះ គឺជាការមើលឃើញនូវការខ្វះខាតជាក់ស្តែងរបស់កម្លាំងនគរបាល ដែលពួកគេជាសេនាធិការដ៏សំខាន់ របស់អាជ្ញាធរខណ្ឌទាំងមូល ក្នុងសកម្មភាពបម្រើប្រជាជន ហើយការចែកជូននៅពេលនេះ គឺជាសកម្មភាព សបញ្ជាក់ពីការគិតគូរ និងយកចិត្តទុកដាក់ខ្ពស់ពីសំណាក់លោកអភិបាលរងខណ្ឌ មកលើមន្ត្រីនគរបាល ដើម្បីឱ្យពួកគាត់យកវាទៅប្រើប្រាស់ក្នុងទិសដៅបម្រើប្រជារាស្ត្រនៅក្នុងមូលដ្ឋានទៅថ្ងៃខាងមុខ បន្តទៀត ។
សូមបញ្ជាក់ថា មន្ត្រីនគរបាលប៉ុស្តិ៍ស្ទឹងមានជ័យ២ មានកម្លាំងសរុប២០នាក់ ក្នុងនោះស្រី៣នាក់ ដោយលោកអភិបាលរង បានឧបត្ថម្ភមួកសុវត្ថិភាពប៉ូលិសចំនួន២០មួក ពោលគឺក្នុងម្នាក់ទទួលបានមួយមួក , អង្គរជារួម៥ប៉ាវ ទឹកសុទ្ធជារួម១០កេស និងថវិការក្នុងម្នាក់២ម៉ឺនរៀលផងដែរ ។
ឈ្លៀតក្នុងឱកាសដដែលខាងលើនោះ លោកឌី រ័ត្នខេមរុណ បានស្នើដល់លោកនាយប៉ុស្តិ៍នគរបាល និងមន្ត្រីនគរបាលប៉ុស្តិ៍ស្ទឹងមានជ័យទី២ទាំងអស់ ត្រូវខិតខំបន្តសកម្មភាពរបស់ខ្លួនបន្ថែមទៀត ក្នុងការបម្រើប្រជាពលរដ្ឋ ដូចជាការធ្វើលិខិតស្នាមឯកសារផ្សេងៗជូនពលរដ្ឋមិនតម្រូវឱ្យយកថវិកា។ ប៉ុន្តែក្នុងនោះចំពោះឯកសារ ដែលច្បាប់តម្រូវឱ្យយក គឺពុំត្រូវយកលើសចំនួនដែលបានកំណត់នោះឡើយ ។
បន្ថែមពីនោះ លោកអភិបាលរងក៏បានស្នើដល់កម្លាំងនគរបាល ត្រូវពង្រាយកម្លាំងរបស់ខ្លួន ចេញល្បាតពួនស្ទាក់ឱ្យបានគ្រប់ច្រកល្ហកទាំងយប់ទាំងថ្ងៃ ដើម្បីជាសកម្មភាពពញ្ញាក់អារម្មណ៍ដល់ក្រុមជនសង្ស័យផ្សេងៗ ដែលប៉ងប្រព៧សកម្មភាពបទល្មើសបង្កភាពភ័យខ្លាចដល់ពលរដ្ឋ ដូចជាអំពើចោរកម្ម លួច ឆក់ ប្លន់ ការចរាចរជួញដូរគ្រឿងញៀន ឬ ក្រុមបងតូចបងធំជាដើម ។
លើសពីនេះ លោកបន្តថា មន្ត្រីនគរបាល ដែលទទួលវេនប្រចាំការនៅស្នាក់ការប៉ុស្តិ៍ គឺត្រូវនៅរងចាំទទួលនូវរាល់ពាក្យបណ្តឹងរបស់ប្រជាពលរដ្ឋ ដើម្បីយកទៅដោះស្រាយជូនពួកគាត់ ឬ ត្រូវមានវិធានការបន្ត ជៀសវៀងការមិនយកចិត្តទុកដាក់ជាមួយទុក្ខកង្វល់របស់ពលរដ្ឋ នាំឱ្យប្រជាពលរដ្ឋកើតចិត្តខឹងស្អប់ និងរើសអើងទៅលើក្រុមមន្ត្រីនគរបាលថាមិនបានបម្រើពួកគាត់ អោយសមស្របនឹងពាក្យថា មន្ត្រីមានកាតព្វកិច្ចបម្រើ និងដោះស្រាយបញ្ហា និងទុក្ខកង្វល់របស់ពលរដ្ឋ ៕
