ភ្នំពេញ៖បុគ្គលិកសាកលវិទ្យាល័យវិទ្យា សាស្ត្រសុខាភិបាលម្នាក់ បានស្លាប់ក្នុងគ្រោះអគ្គីភ័យយ៉ាងរន្ធត់ នៅព្រឹកថ្ងៃទី៨ ឧសភា នេះ។ សមត្ថកិច្ចមិនទាន់សន្និដ្ឋានថា ឆ្លងចរន្តអគ្គិសនី ដូចបណ្ដាញសារព័ត៌មានក្នុងស្រុកផ្សព្វផ្សាយនោះឡើយ ព្រោះសពជនរងគ្រោះស្ថិតក្នុងស្ថានភាពឆេះខ្លោចអង្គុយលើកៅអី ។
សមត្ថកិច្ចកំពុងបើកប្រតិបត្តិស៊ើបអង្កេត និងធ្វើកោសល្យវិច័យ ចំពោះសាកសពបុរសម្នាក់ ដែល ស្លាប់ក្នុងអគ្គីភ័យដែលបានឆាបឆេះនៅក្នុងបន្ទប់នៃ អគារសាកលវិទ្យាល័យវិទ្យាសាស្ត្រសុខាភិបាល ។ បុរសបាត់បង់ជីវិតក្នុងភ្នក់ភ្លើងនោះ គឺជាបុគ្គលិកសាកលវិទ្យាល័យវិទ្យាសាស្ត្រសុខាភិបាល មានវ័យ៣៤ឆ្នាំ ឈ្មោះ ហ៊ុយ សៀក ។ នេះជាករណីស្លាប់ក្នុងអគ្គីភ័យមួយ គិតចាប់ពីខែមករា ២០១៥ មក។
រហូតមកដល់ពេលនេះ សមត្ថកិច្ច មិនទាន់ធ្វើការសន្និដ្ឋានករណីអគ្គីភ័យនេះ ថា បណ្ដាលមកពី មូលហេតុអ្វីនៅឡើយ។ ទាក់ទិនករណីនេះ ប្រធានការិយាល័យនគរបាលបង្ការ និងពន្លត់អគ្គីភ័យ នៃស្នងការដ្ឋាននគរបាលរាជធានីភ្នំពេញ លោក នេត វន្ថា មានប្រសាសន៍ថា៖ «យើងអត់ទាន់ហ៊ាន សន្និដ្ឋានទេ ព្រោះចម្លែក និងចាប់អារម្មណ៍បំផុតនោះ ថាហេតុអីបានភ្លើងឆេះ ហើយបុរសជនរងគ្រោះនោះ មិនជម្លៀស ឬរត់ចេញពីបន្ទប់ដែលកំពុងធ្វើការ។ រីឯការស្លាប់អង្គុយលើកៅអីនេះ ជា ចម្ងល់មួយថា តើគាត់ស្លាប់មុនភ្លើងចេះ ឬក៏យ៉ាងណា។ ដូច្នេះករណីនេះ ត្រូវតែតែធ្វើកោសល្យវិច័យ ទៅលើសាកសពនេះបន្ទាន់ ដើម្បីឈានទៅរកមូលហេតុនៃអគ្គីភ័យនេះ»។
លោកបញ្ជាក់ថា គ្រោះអគ្គីភ័យនេះ បានកើតឡើងនៅម៉ោង៦ និង១៨នាទីព្រឹក ហើយពន្លត់បាន ភ្លាមៗដែរ។
បើតាមតួលេខពីការិយាល័យនគរបាលបង្ការ និងពន្លត់អគ្គីភ័យនៃស្នងការដ្ឋាន នគរបាលរាជធានីភ្នំពេញ បានបង្ហាញថា គិតចាប់ពីខែមករា២០១៥ រហូតដល់ថ្ងៃទី៨ ឧសភានេះ គ្រោះអគ្គីភ័យ បាន កើតឡើង ក្នុងរាជធានីភ្នំពេញចំនួន ៦២លើក បណ្ដាលរបួស១ម្នាក់ និងស្លាប់ម្នាក់ ។ ចំនួននេះ បានកើនឡើងជាង២០ករណី បើប្រៀបធៀបនឹងរយៈពេលដូចគ្នាកាលពីឆ្នាំ២០១៤ ដែលមានតែជាង៤០ករណី ហើយពុំមានអ្នកស្លាប់ និងរបួសទេ។ លោក នេត វន្ថា អះអាងថា គ្រោះអគ្គីភ័យភាគច្រើន គឺកើតឡើងដោយសារឆ្លងចរន្តអគ្គិសនី៕
