ភ្នំពេញ៖ លោក Scott Busby ឧបការីរងក្រសួងការបរទេសសហរដ្ឋអាមេរិក ទទួលបន្ទុកផ្នែកលទ្ធិប្រជាធិបតេយ្យ សិទ្ធិមនុស្ស និងការងារ បានជួបពិភាក្សាជាមួយលោកឩបនាយករដ្ឋមន្ត្រី ហោ ណាំហុង ក្នុងនោះក៏បានសួរនាំពីករណីជនជាតិម៉ុងតាញ៉ា១៣នាក់ ផងដែរ។
ក្នុងដំណើរបំពេញទស្សនកិច្ចនៅកម្ពុជា នៅវេលាម៉ោង៩ព្រឹក ថ្ងៃទី០២ មិថុនានេះលោក Scott Busby បានពិភាក្សាជាមួយឧបនាយករដ្ឋមន្ត្រីលោក ហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជាលើកិច្ចការមួយចំនួន ក្នុងនេះ លោក Scott Busby ក៏បានសួរនាំលោក ហោ ណាំហុង ពីករណីជនជាតិម៉ុងតាញ៉ា១៣នាក់ថាតើកំពុងដំណើរការយ៉ាងដូចម្តេច?
លោក ហោ ណាំហុង បានជម្រាបជូនថា ឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួននៅកម្ពុជា (UNHCR) បាន និងកំពុងស្វះស្វែងរកប្រទេសទី៣ ដើម្បីបញ្ជូនជនជាតិម៉ុងតាញ៉ា ចំនួន១៣នាក់ ឲ្យទៅរស់នៅបន្តទៀត។
លោក ហោ ណាំហុង បានបន្តថា «យើងបានឲ្យលក្ខខណ្ឌ ជាជនភៀសខ្លួន១៣នាក់ ទៅជនជាតិម៉ុងតាញ៉ា ហើយឧត្តមស្នងការ អង្គការសហប្រជាជាតិ ទទួលបន្ទុកជនភៀសខ្លួននៅកម្ពុជា (UNHCR) នៅរាជធានីភ្នំពេញ បាន និងកំពុងរកប្រទេសទី៣ ដើម្បីបញ្ជូនពួកគេទៅទៀត។ យើងបានអនុគ្រោះច្រើនហើយ»៕
