ភ្នំពេញ ៖ ថ្នាក់ដឹកនាំក្រុមហ៊ុនវិនិយោគសាជីវកម្មស្ពាន ថ្នល់ ចិននឹងដាក់ទុនវិនិយោគលើគម្រោងសាងសង់ផ្លូវល្បឿនលឿនពីភ្នំពេញ ទៅបាវិត ខេត្តស្វាយរៀង ព្រំដែនកម្ពុជា-វៀតណាម។ មន្ត្រៅក្រុមហ៊ុនចិប បានថ្លែងបែបនេះ នៅក្នុងជំនួបពិភាក្សាជាមួយម្តេចនាយករដ្ឋមន្ត្រី ហ៊ុន សែន ក្នុងទីក្រុងប៉េកាំង នៅថ្ងៃទី២១ ខែមករា ឆ្នាំ២០១៩។
ជាការឆ្លើយតប សម្តេច ហ៊ុន សែន បានណែនាំឱ្យក្រុមហ៊ុន ត្រូវតែសិក្សានិងជជែកគ្នាបន្ថែមជាមួយនឹងស្ថាប័នពាក់ព័ន្ធ ដោយសារមានក្រុមហ៊ុនជាច្រើនបានសិក្សារួចមកហើយ។
ជុំវិញគម្រោងសាងសង់ផ្លូវល្បឿនលឿនភ្នំពេញ-បាវិតនេះ លោក ស៊ុន ចាន់ថុល រដ្ឋមន្ដ្រីក្រសួងសាធារណៈការ និងដឹកជញ្ជូន បានឱ្យដឹងកាលពីចុងសប្តាហ៍កន្លងទៅថា គម្រោងនេះបានសិក្សាចប់សព្វគ្រប់អស់ហើយ ដែលត្រូវចំណាយថវិកាអស់ប្រមាណ ៣.៨០០លានដុល្លារ។
សូមជម្រាបថា កន្លងមក រាជរដ្ឋាភិបាលបានអនុញ្ញាតឱ្យទីភ្នាក់ងារ សហប្រតិបត្តិការអន្ដរជាតិ នៃប្រទេសជប៉ុន (JICA) ធ្វើការសិក្សាផ្លូវល្បឿនលឿនដែលមានចម្ងាយផ្លូវប្រវែង១៦០គីឡូម៉ែត្រ ដើម្បីធ្វើការសាងសង់ផ្លូវនេះ៕
