ព្រះវិហារ ៖ ផ្ទះទាមធ្វើអំពីឈើ ក្រោមសាប ទំហំ៦×៨ម៉ែត្រ ចំនួនមួយខ្នង រួមនិងទ្រព្យសម្បិត្ត ជាង ១០.០០០ដុល្លា ត្រូវបានអគ្គិភ័យឆាបឆេះយ៉ាងសន្ធោសន្ធៅ បង្កការភ្ញាក់ផ្អើលយ៉ាងខ្លាំង ដល់ប្រជា ពលរដ្ឋទាំងកណ្តាលយប់ មកជួយធ្វើការពន្លត់។ ហេតុការណ៍ខាងលើនេះ បានបង្កការភ្ញាក់ផ្អើល ឡើង នៅវេលាម៉ោងប្រមាណជាង១០ យប់ថ្ងៃទី១៦ ខែកុម្ភៈ ឆ្នាំ២០១៩ ឋិតក្នុងភូមិកំពេញ ឃុំ យាង ស្រុកជាំក្សាន្ត ខេត្តព្រះវិហារ។

ប្រជាពលរដ្ឋនៅនិងកន្លែងកើតហេតុ បាននិយាយប្រាប់ក្រុមការងារយើងឲ្យដឹងថា អគ្គីភ័យនេះកើត ឡើងដោយសារប្តីប្រពន្ធឈ្លោះប្រកែកគ្នា។ពលរដ្ឋបានបន្តថា ដោយសារតែភាគីខាងប្តី មិនចង់នៅ ឈ្លោះប្រកែកជាមួយនឹងប្រពន្ធ ប្តីក៏បានសុំម៉ូតូជិះទៅរកផឹក តែប្រពន្ធមិនឲ្យ ហើយប្តីថា បើមិនឲ្យ ជិះ ទៅរកផឹង សុំជិះទៅលែងផ្ទះនៅឯស្រុកជាមួយកូន ប្រពន្ធថា បើហ៊ានតែយកម៉ូតូជិះ នឹងចាក់ សាំង ដុតចោល។ ភ្លាមនោះប្រពន្ធ បានយកសាំងចាក់ដាក់លើម៉ូតូ រួចយកក្រដាស់ដុតបោះចូល ម៉ូតូនោះ បណ្តាលឲ្យអគ្គីភ័យឆាបឆេះយ៉ាងសន្ធោសន្ធៅទាំងកណ្តាលយប់តែម្តង។

សូមបញ្ជាក់ថា នៅក្នុងករណីអគ្គីភ័យខាងលើនេះ បានបណ្តាលមនុស្សប្រុស/ស្រី៣នាក់រងរបួស ធ្ងន់ និងស្រាល/ ទី១ឈ្មោះ យ៉ែម សុហៃ ភេទប្រុសអាយុ២៤ឆ្នាំ (ប្តី)រងរបួសជើងធ្ងន់/ទី២ឈ្មោះ គីម សាង ភេទស្រី អាយុ៦៦ឆ្នាំ (ម្តាយ)រងរបួសខ្នងធ្ងន់ /និងទី៣ ឈ្មោះ គីម ចិដា ភេទស្រី អាយុ ៣៨ឆ្នាំ(ប្រពន្ធ) រងរបួសស្រាល។ ចំណែក ទ្រព្យសម្បិត្តដែលរងការបាត់បង់ក្នុងករណីអគ្គិភ័យនេះ មានដូចជា÷ ម៉ូតូ១គ្រឿង(សងទ្រីម០១៣)/ម៉ាស៊ីនព្រីនធ័រ១គ្រឿង/ម៉ាស៊ីនកូពីឯកសារ១គ្រឿង/cd ១គ្រឿង/វីដេអូ១គ្រឿង/ម៉ាស៊ីនថតរូបមួយ/កង់១គ្រឿង/គ្រឿងសង្ហារឹមមួយចំនួនធំ និងទ្រព្យសម្បិត្ត ជាច្រើនទៀត ដោយសរុបជាទឹកប្រាក់អស់ប្រមាណជាង១ម៉ឺនដុល្លា ត្រូវបានអគ្គីភ័យលេបត្របាក់ អស់គ្មានសល់។
ជាមួយគ្នានោះ ក៏សង្កេតឃើញមានការចូលរួមជួយអន្តរាគមន៍ពន្លត់ពីលោក ចក់ ជឿត មេភូមិ កំពេញ ផងដែរ៕