សៀមរាប ៖ នៅមុនពេលបញ្ចប់ដំណើទស្សនកិច្ចផ្លុវរដ្ឋនៅកម្ពុជា លោក Moon Jae-in ប្រធានាធិបតីកូរ៉េខាងត្បូង និងលោកជំទាវ បានអញ្ជើញទៅខេត្តសៀមរាប នៅវេលាម៉ោងប្រមាណជាង១០ នាព្រឹកថ្ងៃទី១៦ ខែមីនា ឆ្នាំ២០១៩ នេះ ដើម្បីទស្សនាប្រាសាទព្រះពិធូរ ស្ថិតនៅក្នុងទឹកដីប្រាសាទអង្គរធំ ដែលប្រាសាទនេះកំពុង ស្ថិតនៅក្នុងការជួសជុលរបស់ទីភ្នាក់ងារសហប្រតិបត្តិការកម្ពុជា-កូរ៉េ ។ បន្ទាប់ពីទស្សនាប្រាសាទ ព្រះពិធូររួច លោកប្រធានាធិបតីកូរ៉េ ទៅទស្សនាប្រាសាទអង្គរវត្ត រួចទើបត្រឡប់មកកាន់រាជធានីភ្នំពេញ ដើម្បីធ្វើមាតុភូមិនិវត្តិទៅកាន់ទីក្រុងសេអ៊ូល វិញ។

សូមបញ្ជាក់ថា លោក មូន ចេអ៊ីន ប្រធានាធិបតីកូរ៉េខាងត្បូង បានមកដល់ប្រទេសកម្ពុជានៅថ្ងៃទី១៤ ខែមីនា ក្នុងដំណើរទស្សនកិច្ចផ្លូវរដ្ឋ។ ក្នុងអំឡុងនៃដំណើរទស្សនកិច្ចនេះ លោក មូន បានចូលគាល់ព្រះមហាក្សត្រ ព្រះករុណា ព្រះបាទសម្តេចព្រះបរមនាថ នរោត្តម សីហមុនី។ លោក មូន ចេអ៊ីន ក៏បានជួបជាមួយសម្តេចនាយករដ្ឋមន្ត្រី ហ៊ុន សែន សម្រាប់ធ្វើវេទិកាធុរកិច្ចជាមួយគ្នា និងបានអញ្ជើញជាសាក្សីក្នុងពិធីចុះហត្សលេខាលើឯកសារនៃកិច្ចព្រមព្រៀងសំខាន់ៗចំនួន៥ ពាក់ព័ន្ធនឹងវិស័យសេដ្ឋកិច្ច និងសហប្រតិបត្តិការរវាងប្រទេសទាំងពីរ។ ដំណើរទស្សនកិច្ចរបស់លោក មូន ត្រូវបានបញ្ចប់ដោយលទ្ធល្អប្រសើរ និងបានចាកចេញពីកម្ពុជានៅរសៀលថ្ងៃទី១៦ ខែមីនា ឆ្នាំ២០១៩ នេះ៕