ខេត្តកំពង់ចាម ៖ តំណាងរាស្ត្រមណ្ឌលកំពង់ចាម លោកបណ្ឌិត ម៉ា ឈឿន សម្រេចជួយកសាងអគារ សិក្សាអំពីថ្មប្រក់ក្បឿង១ខ្នង ស្មើ៤បន្ទប់ ដល់សាលាបឋមសិក្សាប្រខ្នោរ ស្ថិតនៅឃុំស្រម៉រ ស្រុកជើងព្រៃ ខេត្តកំពង់ចាម បន្ទាប់ពីសាលារៀនមួយខ្នងនេះ បាក់រលំរាបដល់ដីដោយសារ ខ្យល់កន្ត្រាក់ កាលពីរាត្រីថ្ងៃទី២ ខែឧសភា កន្លងទៅនេះ។

បន្ទាប់ពីបានទទួលព័ត៌មានអាជ្ញាធរអំពីហេតុការណ៍គ្រោះធម្មជាតិខ្យល់កន្រ្តាក់ ដែលបានវាយ បំផ្លាញ់អគារសិក្សាមួយខ្នងទាំងស្រុង នៅសាលាបឋមសិក្សាប្រខ្នោរ ស្ថិតនៅឃុំស្រម៉រ ស្រុកជើងព្រៃ ខេត្តកំពង់ចាម លោក បណ្ឌិត ម៉ា ឈឿន តំណាងរាស្ត្រមណ្ឌលកំពង់ចាម និងជាប្រធានក្រុមការងារ ថ្នាក់ កណ្តាល គណបក្សប្រជាជនកម្ពុជា ចុះជួយស្រុកជើងព្រៃនៅព្រឹកថ្ងៃទី៣ ឧសភា ឆ្នាំ២០១៩នេះ បាន អញ្ជើញដឹកនាំ ក្រុមការងារ រួមជាមួយអភិបាលស្រុក អាជ្ញាធរដែនដី ចុះពិនិត្យស្ថានភាពអគារ សិក្សាមួយ ខ្នងខាងលើដោយផ្ទាល់ដែលក្នុងឱកាសនោះ លោក បណ្ឌិត ម៉ា ឈឿន បានសំដែងការសោកស្តាយ ចំពោះ ការខូចខាតអគារសិក្សានេះ ដែលបានបង្ករឲ្យប៉ះពាល់ដល់កង្វះខាតការ អគារសិក្សារៀនសូត្ររបស់ក្មួយៗ សិស្សា-នុសិស្ស។

ឋិតក្នុងឱកាសនោះ លោកបណ្ឌិត ម៉ា ឈឿន បានណែនាំដល់គណៈគ្រប់គ្រងសាលាលោកគ្រូ អ្នកគ្រូ និង ក្មួយៗសិស្សានុសិស្ស ត្រូវមានការប្រុងប្រយ័ត្ន បើមានភ្លៀងផ្គរ រន្ទះឬខ្យល់កន្ត្រាកជាយថា ហេតុដូចហេតុ ការណ៍ ខាងលើនេះ ពិសេសក្នុងពេលដែលសិស្សកំពុងសិក្សារៀនសូត្រ ត្រូវនាំសិស្សចាកចេញពីកន្លែង ហានិភ័យ ទៅរកទីកន្លែងដែលមានសុវត្ថិភាព ដើម្បីបង្ការកុំឲ្យកើតមានគ្រោះថ្នាក់ជាយថាហេតុណាមួយ។ ទន្ទឹមនេះ លោកបណ្ឌិត ម៉ា ឈឿន ក៍បានក្រើនរំលឹកដល់អាជ្ញាធរនិងសមត្ថកិច្ចនៅគ្រប់មូលដ្ឋាន ត្រូវតាម ដានបញ្ហាអាកាសធាតុឲ្យបានដិតដល់ ត្រូវប្រញាប់ប្រញាល់រូតរះចុះជួយអន្តរាគមន៍ឲ្យបានទាន់ពេលវេលា នៅពេលដែលមានប្រជាពលរដ្ឋទទួលរងគ្រោះដោយបាតុភូតធម្មជាតិនានា។

បើតាមការឲ្យដឹងពី លោក សៀង ស៊ន នាយកស្តីទីសាលាបឋមសិក្សាប្រខ្នោរ បានឲ្យដឹងថា នៅវេលា ម៉ោង ៧ និង២០នាទី យប់ថ្ងៃទី២ ឧសភា មានបាតុភូតភ្លៀងផ្គរលាយលំនិងខ្យល់កន្ត្រាក់ បានបក់បោក បំផ្លាញ់ខ្ទិចនូវអគារសិក្សាឈើប្រក់ក្បៀង ១ខ្នង ស្មើ៤បន្ទប់ កសាងកាលពីអំឡុងឆ្នាំ១៩៩៧។

លោកនាយកស្តីទីសាលាបឋមសិក្សាប្រខ្នោរ បានឲ្យដឹងថា ពីមុនសាលានេះមានអាគារសិក្សា ២ខ្នង ដែលបានសម្រួលដល់ការរៀនសូត្ររបស់សិស្ស ១ ពេល ក្នុង ១ថ្ងៃ។ ប៉ុន្តែបន្ទាប់ពីអាគារនេះ មានស្ថាន ភាពចាស់ទ្រុឌទ្រោមពេក គណៈគ្រប់គ្រងសាលាបានសម្រេចផ្អាក់មិនឲ្យបង្រៀននៅអាគារនេះ ប្រមាណ ៣ឆ្នាំមកហើយ។ សព្វថ្ងៃនេះ សាលាមានតែអាគារសិក្សា ១ខ្នងស្មើរ ៦បន្ទប់ប៉ុណ្ណោះ មិនសមស្របទៅ និងចំនួនសិស្សដែលមានរហូតទៅដល់ជិត ៣០០នាក់។

លោក សៀង ស៊ន ក្នុងនាមលោកគ្រូ អ្នកគ្រូ និងក្មួយៗសិស្សានុសិស្ស បានថ្លែងអំណរ គុណ លោកបណ្ឌិត ម៉ា ឈឿន តំណាងរាស្ត្រមណ្ឌលកំពង់ចាម ដែលតែងបានផ្សារភ្ជាប់សុខទុក្ខជាមួយរាស្ត្រគ្រប់កាលៈទេសៈ ជាពិសេសក្នុងគ្រាដែលប្រជាពលរដ្ឋជួបបញ្ហា គឺតែងមានមុខជានិច្ចចុះជួបសួរសុខទុក្ខ និងជួយដោះស្រាយ នូវការលំបាករបស់ប្រជាពលរដ្ឋ។

សូមជម្រាបថា បន្ទាប់ពីបានចុះពិនិត្យនូវស្ថានភាពជាក់ស្តែង រួមនឹងជ្រាបពីសម្រូវការចាប់បាច់របស់លោក គ្រូអ្នកគ្រូ និងសិស្សានុសិស្ស នៃសាលាបឋមសិក្សាប្រខ្នោររួចមក អ្នកតំណាងរាស្ត្រ ម៉ា ឈឿន ក៏បាន សម្រេចជួយសាងសង់អគារសិក្សាមួយខ្នង មាន៤បន្ទប់ នៅលើទីតាំងអគារចាស់ដែលបានដូលរំលំ ទាំង ស្រុង ជូនសាលាបឋមសិក្សាប្រខ្នោរ ខាងលើ នេះតែម្តង៕ĵ