ភ្នំពេញ ៖ សិប្បកម្មកែច្នៃឈើមួយកន្លែង ត្រូវបានកម្លាំងគណៈបញ្ជាការឯកភាពខណ្ឌ ពោធិ៍សែន ជ័យ ចុះត្រួតពិនិត្យរកឃើញសិប្បកម្មផលិត បារីម៉ាក Ligun (បារីចិន) ដែលផ្សំពីកម្ទេចឈើអាចម៌ រណារ បង្កប់នៅក្នុងសិប្បកម្មនោះ ដែលអាច បង្កផលប៉ះពាល់ដល់សុខភាពអ្នកជក់។

ការត្រួតពិនិត្យ សិកម្មនេះកាលពីវេលាម៉ោង១០និង១០នាទីព្រឹកថ្ងៃទី១០ ខែឧសភា ឆ្នាំ២០១៩ ដឹកនាំដោយ លោក ព្រាប ម៉ាណែល អភិបាលរងខណ្ឌពោធិ៍សែនជ័យ ព្រមទាំងមានការសម្រប សម្រួលពីលោក អ៊ុ សុភ័ក្រ ព្រះរាជអាជ្ញារង អមសាលាដំបូងរាជធានីភ្នំពេញ។

ទីតាំងសិប្បកម្មកែច្នៃឈើលួចលាក់ផលិត បារីធ្វើពីអាចម៍រណានេះ ពុំមានយីហោនោះទេ ស្ថិតនៅ ភូមិទួលសាម៉រ សង្កាត់កំបូល ខណ្ឌពោធិ៍សែនជ័យ រាជធានីភ្នំពេញដែលមានម្ចាស់ឈ្មោះ លាង តុងឡេង ភេទប្រុស អាយុ៣៥ឆ្នាំ។

តាមអាជ្ញាធរ បានអោយដឹងថា ដោយមានការរាយការណ៍ពីប្រជាពលរដ្ឋដែលមានការសង្ស័យ ថា សិប្បកម្មនេះ ផលិតបារីធ្វើពីកម្ទេចឈើ ដែលជាការក្លែងបន្លំបង្កអោយបះពាល់ដល់សុខភាព។ បន្ទាប់មក អាជ្ញាធរក៏បានរាយការណ៍ទៅព្រះរាអាជ្ញារង អមសាលាដំបូងរាជធានីភ្នំពេញ ដើម្បីចុះ ត្រូតពិនិត្យដោយមានការចូលរួមសហការពីមន្ត្រីបរិស្ថានខណ្ឌ និងមន្រ្តីពាក់ព័ន្ធមួយចំនួនផងដែរ។

តាមព័ត៌មានអោយដឹងថា ក្នុងការត្រូតពិនិត្យ ត្រូវបានម្ចាស់សិប្បកម្មរារ៉ាំង ពន្យាពេលប្រមាណ ប្រមាណ ១ម៉ោង ក្រោយមកទើបអនុញ្ញាតិ។ នៅក្នុងការត្រួតពិនិត្យគណៈកម្មាការចម្រុះ បានរក ឃើញថា ទីតាំងសិប្បកម្មនោះ នៅផ្នែកខាងមុខ រៀបចំ កែច្នៃឈើប្រភេទឈើអាកាស្យា សម្រាប់ តម្រូវការតាមការដ្ឋានសំណង់ ។ ចំណែកខាងក្រោយ ជាសិប្បកម្មផលិតបារីម៉ាក Ligun ដែលការ ផលិតបារីដោយយកថ្នាំជក់លាយកម្ទេចឈើអាចម៍រណារផ្សំលាយចូលគ្នា។តាមអាជ្ញាធរ បានអោយ ដឹងថា ទីតាំងពុំមានច្បាប់អនុញ្ញាតិឡើយ ហើយបានកែច្នៃ ផលិតបារីធ្វើពី អាចម៍រណា ជាហេតុធ្វើ ឲ្យប៉ះពាល់ដល់សុខភាព។

តាមម្ចាស់សិប្បកម្ម បានអោយកម្លាំងចម្រុះដឹងថា ទីតាំងនេះគាត់បានជួលទៅឲ្យជនជាតិចិន១ក្រុម ដើម្បីបើកសិប្បកម្ម កាលពីជាង៤ខែមុន ហើយជនជាតិចិន បានបើកកែច្នៃឈើ និងផលិតបារី។ បន្ទាប់ពីជួលបានប្រមាណ១ខែ ក៏ឈប់ជួល តែជនជាតិចិន មិនទាន់ទៅដឹកយកម៉ាស៊ីនផលិតបារី ចេញពីទីតាំងនោះឡើយ នៅសល់តែផ្នែកខាងមុខដែលកែច្នៃឈើប៉ុណ្ណោះ ត្រូវបានបន្តដំណើរ ការ រហូតមក។ ទោះបីជាយ៉ាងនេះក្តី សមត្ថកិច្ចចម្រុះ បានសម្រេចបិទផ្អាក សិប្បកម្មជាបណ្តោះអាសន្ន ព្រោះគ្មានច្បាប់អនុញ្ញាត ប៉ុន្តែសមត្ថកិច្ច មិនបានដកហូតសម្ភារៈ ឬឃាត់ម្ចាស់នោះឡើយ៕