ភ្នំពេញ ៖ ដើម្បីកាត់បន្ថយជាបន្តើរៗការប្រើប្រាស់បន្លែគីមី និងគ្មានគុណភាពដែលនាំចូលគ្មានប្រភពច្បាស់លាស់ ក្នុងគោលបំណង ដើម្បីពិភាក្សារិះរកវិធានការរួមក្នុងការលើកកំពស់ការប្រើប្រាស់បន្លែសុវត្ថិភាពរបស់ប្រជាពលរដ្ឋកម្ពុជា ធនាគារអភិវឌ្ឍន៍ជនបទ ​បានបើកកិច្ចប្រជុំពិភាក្សាអំពីគំរោងគាំទ្រការដាំដុះបន្លែសុវត្ថិភាពនៅកម្ពុជា ជាមួយតំណាងក្រុមហ៊ុនពាក់ព័ន្ធប្រមាណជាង ១០ក្រុមហ៊ុន ប្រចាំនៅរាជធានីភ្នំពេញ ថ្ងៃទី១៧ ខែឧសភា ឆ្នាំ២០១៩។

លោក កៅ ថាច អគ្គនាយកនៃធនាគារអភិវឌ្ឍន៍ជនបទ ដែលបានចូលរួមក្នុងកិច្ចប្រជុំនេះ បានមានប្រសាសន៍ថា ធនាគារអភិវឌ្ឍន៍ជនបទ ក្នុងនាមជាធនាគាររដ្ឋបម្រើឲ្យគោលនយោបាយរបស់រាជរដ្ឋាភិបាល បានត្រៀមរួចជាស្រេចនូវកញ្ចប់ឥណទាន ក៏ដូចជាក្រុមការងារបច្ចេកទេសដើម្បីសហការណ៍ជាមួយសហគមន៍អ្នកផលិត និងក្រុមហ៊ុនអ្នកទទួលទិញ។

លោកអគ្គនាយក បានបញ្ជាក់ទៀតថា ប៉ុន្តែអ្វីដែលសំខាន់នោះ គឺបញ្ហាទីផ្សារ ទន្ទឹមនឹងការផលិតបន្លែសុវត្ថិភាពមិនស្របតាមស្តង់ដារដែលជាហេតុធ្វើឲ្យការប្រគួតប្រជែងលើទីផ្សារមិនសូវទទួលបានលទ្ធផលល្អ។ លោកបាន ស្នើសុំឲ្យភាគីអ្នកទិញបន្លែសុវត្ថិភាពជួយទំលាក់ធាតុចូលសំខាន់ៗដើម្បីគាំទ្រគំរោងការប្រើប្រាស់បន្លែសុវត្ថិភាពផលិតដោយកូនខ្មែរ ព្រមទាំងជួយលើកកំពស់ការអភិវឌ្ឍសេដ្ឋកិច្ចជនបទផងដែរ។

សូមបញ្ជាក់ថា ក្នុងកិច្ចប្រជុំនោះបានសម្រេចបង្កើតក្រុមការងារមួយដោយមានតំណាងពីធនាគារអភិវឌ្ឍន៍ជនបទ ក្រុមហ៊ុនទិញ-លក់បន្លែសុវត្ថិភាព ដើម្បីធ្វើការសិក្សារួមគ្នាលើបញ្ហាទីផ្សារបន្លែ និងយន្តការណ៍គន្លឹះសំខាន់ៗដើម្បីអភិវឌ្ឍន៍ការដាំដុះបន្លែសុវត្ថិភាពនៅកម្ពុជាឲ្យមានប្រសិទ្ធភាពខ្ពស់៕ ​ប្រភព ៖  Daily-khmer