ខេត្តរតនគិរីៈ អគ្គីភ័យបានឆាបឆេះយ៉ាងសន្ធោសន្ធៅបំផ្លាញលំនៅឋានមួយខ្នងរបស់មន្ត្រីប៉េអឹមខេត្តរតនគិរី និងជាអ្នករកស៊ីឈើល្មើសច្បាប់ដ៏ធំមួយកន្លែងមានទីតាំងខាងក្រោយផ្សារបានលុង ស្ថិតក្នុងភូមិជ័យជំនៈ សង្កាត់ឡាបានសៀក ក្រុងបានលុង បង្កការភ្ញាក់ផ្អើលពេញផ្សារក្រុងបានលុង កាលពីវេលាម៉ោង៩និង៤៥នាទី ថ្ងៃទី២៧ ខែមិថុនា ឆ្នាំ២០១៥ ។
សមត្ថកិច្ចបានឲ្យដឹងថា អគ្គីភ័យនេះ ផ្តើមចេញពីផ្ទះមន្ត្រីប៉េអឹមឈ្មោះទុយ គឹមហួន ដែលផ្ទះសង់អំពីឈើលើថ្មក្រោមប្រក់ស័ង្កសី ទំហំទទឹង៨ម៉ែត្រ បណ្តោយ១៣ម៉ែត្រ បណ្តាលមកពីឆ្លងចរន្តអគ្គីសនី។
អាជីវករ នៅផ្សារបានលុងបានឲ្យដឹងថា ក្រោយពេលកើតហេតុប្រហែលជា២០នាទីទើបគេឃើញរថយន្តពន្លត់អគ្គីភ័យមួយគ្រឿងបានមកដល់ ប៉ុន្តែប្រើការមិនកើត លុះប្រហែលជា២០នាទីក្រោយមកទៀត ទើបមានរថយន្តមួយគ្រឿងទៀតមកដល់។ប្រភពបន្តថា ការយឺតយ៉ាវនេះដោយសារកកស្ទះចរាចរណ៍មនុស្សម្នាណែនតាន់តាប់មកចោមរោមហេតុការណ៍នោះ។ ដោយមានការអន្តរាគមន៍ពីសមត្ថកិច្ចទើបរថយន្តពន្លត់អគ្គីភ័យនោះបានចូលទៅដល់កន្លែងកើតហេតុបាញ់ទឹកពន្លត់ទាន់ពេលវេលា និងទប់ស្កាត់ឲ្យផ្ទះពីរល្វែងជាប់សងខាងទទួលរងនូវការឆាប់ឆេះរោលផ្សែងប៉ុណ្ណោះ មិនបណ្តាលឲ្យឆាប់ឆេះធ្ងន់ធ្ងរនោះទេ។
ប្រភពពីកន្លែងកើតហេតុពេលភ្លើងកំពុងឆាប់ឆេះដំបូងមានសន្ទុះឡើងយ៉ាងខ្លាំងធ្វើឲ្យម្ចាស់ផ្ទះឈ្មោះទុយ គឹមហួន ភេទប្រុស ជាមន្ត្រីប៉េអឹម និងជាអ្នករកស៊ីឈើល្មើសច្បាប់ដ៏ធំម្នាក់នៅក្នុងខេត្ត មានការតក់ស្លុតរហូតសន្លប់ទាំងពីរនាក់ប្តីប្រពន្ធ ទើបអ្នកជិតខាងទូរស័ព្ទហៅរថយន្តសង្គ្រោះដឹកបញ្ជូនទៅមន្ទីរពេទ្យបង្អែកខេត្ត។
បន្ទាប់ពីមានហេតុការណ៍ភ្លើងកំពុងឆេះគេសង្កេតឃើញមានការជញ្ជូនចេញជំលៀសសុទ្ធសឹងតែជាគ្រឿងសង្ហារឹមខ្នាតយក្ខប្រភេទឈើប្រណីត និងមិនទាន់កែច្នៃមួយចំនួនដឹកតាមរថយន្តជាបន្តបន្ទាប់។ ប្រជាពលរដ្ឋដែលមានផ្ទះល្វែងជាប់ៗគ្នានៅកន្លែងដែលកំពុងឆេះក៏ក៏ប្រញាប់ប្រញាល់ជញ្ជូនសម្ភារៈទ្រព្យសម្បត្តិរៀងៗខ្លួនចេញពីក្នុងផ្ទះដាក់តាមដងផ្លូវ។ យ៉ាងណាក៏ដោយក្នុងហេតុការអគ្គីភ័យឆាប់ឆេះលំនៅឋានមួយនេះពុំទាន់បានដឹងចំនួនខូចខាតសម្ភារៈ ទ្រព្យសម្បត្តិពិតប្រាកដនៅឡើយទេ។
សូមបញ្ជាក់ថាទីតាំងដែលអគ្គីភ័យកំពុងឆាប់ឆេះនេះ គឺជាកន្លែងស្តុកឈើល្មើសច្បាប់ជាយូរមកហើយ ៗធ្លាប់ទទួលរងការឆាប់ឆេះក្បែរបរិវេណផ្ទះជាប់ៗគ្នានេះចំនួន៣លើករួចមកហើយ និងបណ្តាលឲ្យស្ត្រីចំណាស់ម្នាក់ស្លាប់នៅក្នុងភ្លើងឆេះនោះទៀតផង កាលពីប៉ុន្មានឆ្នាំកន្លងទៅ ។
គួររំលឹកថា ក្នុងខែមិថុនានេះក៏មានអគ្គីភ័យលេបត្របាក់លំនៅឋានចំនួន២លើកមកដែរ លើកទីមួយកើតឡើងនៅផ្ទះលក់សំឡរចាណាង (តាមភាសារបស់ជនជាតិដើមភាគតិចឡាវធ្លាប់ហៅ)ឈ្មោះ ថន ធុន ភេទប្រុស អាយុ៥៧ឆ្នាំ ជាមន្ត្រីយោធាតំបន់ប្រតិបការសឹករងខេត្ត ដែលបានកើតឡើងនៅថ្ងៃទី២២ ខែមិថុនា ឆ្នាំ២០១៥ ហើយលើកទី២កើតឡើងនៅថ្ងៃទី២៧ ខែមិថុនា ឆ្នាំ២០១៥ ផ្ទះរបស់មន្ត្រីកងរាជអាវុធហត្ថខេត្តឈ្មោះទុយ គឹមហួន ដែលនៅជាប់ខាងត្បូងផ្សារបានលុង ស្ថិតនៅភូមិជ័យជំនៈ សង្កាត់ឡាបានសៀក ក្រុងបានលុង នេះតែម្តង។
គួរបញ្ជាក់ផងដែរថានៅក្នុងហេតុការណ៍អគ្គិភ័យឆាបឆេះនេះ មានរថយន្តពន្លត់អគ្គីភ័យចំនួន២គ្រឿង និងសមត្ថកិច្ចគ្រប់លំដាប់ចុះមកជួយធ្វើអន្តរាគមន៍នឹងធ្វើកំណត់ហេតុដើម្បីដោះស្រាយតាមស្ថានភាពជាក់ស្តែងនេះ៕ដោយ៖ឡុង សារ៉េត
