ភ្នំពេញ ៖ ក្រុមប្រឹក្សាធម្មនុញ្ញកម្ពុជានឹងធ្វើជាម្ចាស់ផ្ទះ នៃកិច្ចប្រជុំអចិន្ត្រៃយ៍សមាគមតុលាការធម្មនុញ្ញនិយាយភាសាបារាំង ចាប់ពីថ្ងៃទី២៧ ដល់ថ្ងៃទី៣០ ខែតុលា ឆ្នាំ២០១៩ខាងមុខនេះ។ នេះបើយោងតាមសេចក្តីប្រកាសព័ត៌មានរបស់អគ្គលេខាធិការ នៃក្រុមប្រឹក្សាធម្មនុញ្ញចុះថ្ងៃទី២១ ខែតុលា ឆ្នាំ២០១៩នេះ។
យោងតាមសេចក្តីប្រកាសព័ត៌មានដដែលបន្តថា កិច្ចប្រជុំគណៈអចិន្ត្រៃយ៍នៃសមាគមតុលាការធម្មនុញ្ញហ្វ្រង់កូហ្វូន (អាសេសេអេហ្វ) នៅសណ្ឋាគារ សូហ្វីតែលភូគីត្រា ខេត្តសៀមរាប។ កិច្ចប្រជុំនេះនឹងដឹកនាំដោយលោកប្រធានតុលាការកំពូលនៃប្រទេសកាណាដា ដែលបានទទួលអាណត្តិជាប្រធានសមាគម ACCF និងចូលរួមដោយថ្នាក់ដឹកនាំចំនួន៣០រូបនៃ ក្រុមប្រឹក្សាធម្មនុញ្ញ, តុលាការធម្មនុញ្ញ និងតុលាការកំពូល មកពីប្រទេសចំនួន១១ រួមមាន៖ កម្ពុជា កាណាដា ស្វីស សេណេហ្គាល់ បេណាំង ម៉ាលី ប៊ែលហ្ស៊ីក រ៉ូម៉ានី បារាំង ម៉ារ៉ុក និងហ្គាបុង៕
