ភ្នំពេញ៖សារនៅលើគណនី Facebook របស់លោក សម រង្ស៊ី កាលពីថ្ងៃទី០៤ ខែកក្កដា នេះបានសរសេរថា ព្រះករុណាសម្តេចព្រះនរោត្តម សីហនុ បានថ្កោលទោស លោក វ៉ា គឹមហុង ក្នុងរឿងផែនទីមិនត្រឹមត្រូវដែលយកទៅចរចាជាមួយប្រទេសវៀតណាម ដើម្បីកំណត់ព្រំដែនកាលពីឆ្នាំ២០០៥។
ខាងក្រោមនេះ ជាអត្ថបទដកស្រង់ចេញពីគេហទំព័រ Facebook របស់លោក សម រង្ស៊ី៖ ព្រះរាជសារ ចុះថ្ងៃ ១៦ មិនា ២០០៥ របស់សម្តេចព្រះនរោត្តម សីហនុ ដែលបានចុះផ្សាយក្នុងព្រឹត្តិបត្រ BMD ជាភាសាបារាំង ( http://tinyurl.com/pte6h24 ) ហើយដែលយើងបានបកប្រែជាខេមរភាសាដូចតទៅ៖ “សាធារណរដ្ឋសង្គមនិយមវៀតណាម បានបង្កើតព្រំដែនថ្មី (ចំណេញទៅគេ) ដោយសាងសង់នៅទស្សវត្សឆ្នាំ១៩៨០ និងឆ្នាំ ១៩៩០-២០០០ នូវក្លោងទ្វារ ហើយដោយជីកប្រឡាយទឹក ដែលស្ថិតនៅក្នុងទឹកដីប្រទេសកម្ពុជា ឆ្ងាយពីព្រំដែនយើង កាលពីឆ្នាំ១៩៦៣-១៩៦៩។
កម្ពុជាយើងសព្វថ្ងៃ តំណាងដោយក្រុមឯកឧត្តម វ៉ា គឹមហុង យល់ព្រមធ្វើអត្តឃាតខ្លួនឯង ដោយទទួលស្គាល់ សូម្បីតែនៅចំពោះមុខច្បាប់អន្តរជាតិថាប្រទេសកម្ពុជាគ្មានព្រំដែន ច្បាស់លាស់ទេ។ពាក្យអត្តឃាតនេះ គឺមិននិយាយបំផ្លើសទេ ពីព្រោះថា ប្រទេសណាមួយ ដែលទទួលស្គាល់ខ្លួនឯងថា ខ្លួនគ្មានព្រំដែន ផ្លូវច្បាប់ច្បាស់លាស់ទេ ប្រទេសនោះ គឺជាប្រទេសមួយ ដែលចាំតែស្លាប់ ”៕
