ឈីលី ៖ ក្រុមមន្ត្រីឈីលីនិយាយថា ពួកគេបានរកឃើញបំណែកមួយចំនួន ដែលគេជឿថា ជាបំណែករបស់យន្តហោះយោធាឈីលី C-130 ដែលបានបាត់ខ្លួនកាលពីថ្ងៃច័ន្ទ។ នេះបើយោងតាមប្រភពពី BBC ។
ពួកគេបាននិយាយថា បំណែកយន្តហោះត្រូវបានគេរកឃើញអណ្តែតចម្ងាយ ៣០ គីឡូម៉ែត្រពីកន្លែងដែលយន្តហោះដឹកទំនិញ C-130 Hercules និងមនុស្ស ៣៨ នាក់នៅលើយន្តហោះបានទាក់ទងចុងក្រោយ ហើយបើតាមអាជ្ញាធាឈីលី បំណែកនេះអាចជាផ្នែកមួយនៃធុងសាំង ស្ថិតនៅផ្នែកខាងក្នុងរបស់យន្ដហោះ។
ទោះបីជាយោធាឈីលីបានបញ្ជាក់ថា យន្តហោះនោះបានធ្លាក់បាត់ទៅហើយក្តី ប៉ុន្តែជោគវាសនារបស់មនុស្សទាំង ៣៨នាក់នៅមិនទាន់អាចដឹងច្បាស់នៅឡើយទេ។
គួរបញ្ជាក់ថា យន្តហោះយោធា C-130 បានបាត់ដំណឹងកាលពីល្ងាចថ្ងៃចន្ទ បន្ទាប់ពីបានហោះចាកចេញពីទីក្រុង Punta Arenasស្ថិតនៅភាគខាងត្បូងប្រទេសឈីលី ឆ្ពោះទៅមូលដ្ឋានឈរជើង Presidente Eduardo Frei Montalva ក្នុងទ្វីបតំបន់Antarctic៕
