អាមេរិក ៖ ក្រុមហ៊ុនយក្សអាមេរិក Boeing បានប្រកាសថា ខ្លួននឹងផ្អាកការផលិតយន្តហោះត្រកូល 737 MAX ចាប់ពីខែមករា ឆ្នាំ២០២០ ខាងមុខនេះតទៅហើយ បន្ទាប់ពីអាជ្ញាធរត្រួតពិនិត្យរបស់អាមេរិក ត្រូវការពេលវេលាបន្ថែមទៀត ដើម្បីបញ្ជាក់អំពីសុវត្ថិភាព និងបញ្ហារបស់យន្តហោះប្រភេទនេះ។ នេះបើតាមសារព័ត៌មានចិន CGTN។

នៅក្នុងសេចក្តីថ្លែងការណ៍ ដែលត្រូវបានចេញផ្សាយនៅថ្ងៃចន្ទសប្តាហ៍នេះ ក្រុមហ៊ុន Boeing បានអះអាងថា ការសម្រេចចិត្តផ្អាកផលិតកម្មរបស់យន្តហោះ 737 MAX គឺត្រូវបានធ្វើឡើងដោយយោងលើកត្តាសំខាន់ៗមួយចំនួន ក្នុងនោះមានទាំងការពន្យារពេល ផ្តល់អាជ្ញាធរសុវត្ថិភាពពីសំណាក់ប្រតិបត្តិករអាកាសចរណ៍អាមេរិក រហូតដល់ឆ្នាំ២០២០ ក៏ដូចជាភាពមិនច្បាស់លាស់នៃការកំណត់ពេលវេលា ដើម្បីអនុញ្ញាតឲ្យយន្តហោះ Boeing 737 MAX នៅទូទាំងពិភពលោកអាចធ្វើប្រតិបត្តិការវិញជាដើម៕