កូរ៉េខាងជើង ៖ ទីភ្នាក់ងារសារព័ត៌មានរដ្ឋ KCNA បានរាយការណ៍ថា ប្រទេសកូរ៉េខាងជើងបានស្តីបន្ទោសទៅសហរដ្ឋអាមេរិកវិញដោយសារតែការលើកឡើងអំពីបញ្ហាទាក់ទងនឹងកំណត់ត្រាសិទ្ធិមនុស្សរបស់ខ្លួនកាលពីថ្ងៃសៅរ៍ដោយនិយាយថា “ពាក្យសម្តីព្យាបាទ” របស់ទីក្រុងវ៉ាស៊ីនតោននឹងធ្វើឲ្យមានភាពតានតឹងកាន់តែខ្លាំងឡើងនៅលើឧបទ្វីបកូរ៉េ។
សេចក្តីថ្លែងការណ៍របស់ KCNA បានព្រមានថា ប្រសិនបើសហរដ្ឋអាមេរិកហ៊ានលើកឡើងបញ្ហាជាមួយប្រព័ន្ធរដ្ឋាភិបាលកូរ៉េខាងជើងដោយសម្អាងលើបញ្ហាសិទ្ធិមនុស្សនោះ ពួកគេនឹងត្រូវ “រងទុក្ខ”។
មហាសន្និបាតអង្គការសហប្រជាជាតិកាលពីថ្ងៃពុធបានថ្កោលទោសការរំលោភសិទ្ធិមនុស្សជាយូរមកហើយនិងជាបន្តរបស់ប្រទេសកូរ៉េខាងជើងនៅក្នុងសេចក្តីសម្រេចប្រចាំឆ្នាំមួយដែលឧបត្ថម្ភដោយប្រទេសរាប់សិបរួមមានទាំងសហរដ្ឋអាមេរិកផងដែរប៉ុន្តែត្រូវបានប្រេសិតអង្គការសហប្រជាជាតិរបស់ទីក្រុងព្យុងយ៉ាងបដិសេធ។
សេចក្តីថ្លែងការណ៍របស់ក្រសួងការបរទេសកូរ៉េខាងជើងនេះគឺជាលើកដំបូងហើយចាប់តាំងពីប្រេសិតពិសេសរបស់សហរដ្ឋអាមេរិកទទួលបន្ទុកកូរ៉េខាងជើងលោក Stephen Biegun កាលពីថ្ងៃចន្ទបានជំរុញជាសាធារណៈឲ្យទីក្រុងព្យុងយ៉ាងវិលត្រឡប់ទៅរកកិច្ចពិភាក្សាវិញ។
ទោះបីជាយ៉ាងណាក៏ដោយ មិនមានការឆ្លើយតបដោយផ្ទាល់ពីប្រទេសកូរ៉េខាងជើងចំពោះការសំណូមពររបស់លោក Biegun ទេ។ ប្រទេសកូរ៉េខាងជើងបានធ្វើការសាកល្បងអាវុធជាបន្តបន្ទាប់នៅក្នុងរយៈពេលប៉ុន្មានសប្តាហ៍ថ្មីៗនេះហើយអ្នកជំនាញមួយចំនួនបាននិយាយថា រដ្ឋឯកោមួយនេះអាចនឹងត្រៀមខ្លួនសម្រាប់ការសាកល្បងមីស៊ីលផ្លោងអន្តរទ្វីបមួយគ្រាប់ដែលអាចធ្វើឲ្យខ្លួនវិលត្រឡប់ទៅរកផ្លូវនៃការប្រឈមមុខដាក់គ្នាជាមួយសហរដ្ឋអាមេរិកវិញ៕
