ខេត្តបន្ទាយមានជ័យ ៖ លោក ចាន់ យុត្ថា រដ្ឋលេខាធិការក្រសួងធនធានទឹក និងឧតុនិយម និងជាប្រធានមុខព្រួញខេត្តបាត់ដំបង ខេត្តបន្ទាយមានជ័យ និងខេត្តឧត្តរមានជ័យបានឲ្យដឹងថា យោងតាមការពិនិត្យជាក់ស្ដែង ប្រភពទឹកនៅស្ទឹងមង្គលបូរី អាចធានាការប្រើប្រាស់បានតែក្នុងរយៈពេល០៣ ថ្ងៃទៀតប៉ុណ្ណោះ។
ការបញ្ជាក់របស់លោករដ្ឋលេខាធិការបែបនេះក្នុងឱកាសអញ្ជើញចុះចុះពិនិត្យ និងអន្តរាគមន៍បូមទឹកសង្រ្គោះស្រូវប្រាំងក្នុងខេត្តបន្ទាយមានជ័យរសៀលថ្ងៃពុធ ១៤កើត ខែបុស្ស ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០៨ ខែមករា ឆ្នាំ២០២០នេះ។ លោកថា គឺដោយហេតុថា ស្រុកមង្គលបុរីមានការដាំដុះស្រូវប្រាំងរហូតដល់ទៅជិត៨ ម៉ឺនហិកតា ( ផែនការខេត្ត៧ពាន់ហិកតា ) ក្នុងនោះមានការដាំដុះស្រូវប្រាំងលើកទី១ ជាង៥ម៉ឺនហិកតា និងស្រូវប្រាំងលើកទី២ ជាង២ម៉ឺនហិកតា។
លោករដ្ឋលេខាធិការសង្កត់ធ្ងន់ថា ចំពោះមុខបញ្ហានេះ លោកបានដឹកនាំក្រុមការងារបង្វែរទឹកពីប្រភពផ្សេងមកកាន់ស្រុក ដោយដំឡើងស្ថានីយបូមទឹកចេញពីស្ទឹងសិរីសោភណ្ឌ ទម្លាក់ចូលប្រឡាយមេឲ្យហូរចូលទៅក្នុងស្ទឹងមង្គលបុរី។ ទន្ទឹមនេះលោករដ្ឋលេខាធិការក៏បានណែនាំដល់អាជ្ញាធរស្រុក ឃុំ ជួយផ្សព្វផ្សាយដល់ប្រជាពលរដ្ឋ សូមកុំធ្វើការដាំដុះស្រូវប្រាំងបន្ថែមទៀត ព្រោះទឹកដែលបង្វែរទៅនេះ គឺអាចឆ្លើយតបតែទៅលើការប្រើប្រាស់ក្នុងជីវភាពប្រចាំថ្ងៃតែប៉ុណ្ណោះ ក្នុងការប្រើប្រាស់ទៀតសោត ក៏ត្រូវចូលរួមសន្សំសំចៃ ព្រោះរដូវប្រាំង នៅសល់រយៈពេលវែងទៀត៕ 
